АҚШ президенти Дональд Трамп Башар Асад режими қулаганидан кейин Сурияга қарши санкцияларни олиб ташлаш ниятида эканлигини эълон қилди. У, шунингдек, Суриянинг вақтинчалик президенти Аҳмад ал-Шараа билан учрашди.
2025 йил 13 май куни Ар-Риёддаги инвестиция форумида сўзлаган нутқида, “Мен Сурияга уларга буюкликка эришиш имкониятини бериш учун санкцияларни олиб ташлаш ҳақида фармон бераман”, – деди Трамп. “Уларнинг порлаш вақти келди. Биз уларнинг [санкцияларини] барчасини олиб ташлаймиз. Омад, Сурия, бизга нимага қодирлигингни кўрсат”, – дея қўшимча қилди у.
Трампнинг сўзларига кўра, у Суриядаги вазиятни Саудия Арабистони валиаҳд шаҳзодаси Муҳаммад бин Салмон ва Туркия президенти Ражаб Тоййиб Эрдўғон билан муҳокама қилганидан кейин шундай қарорга келган.
Reuters агентлигининг қайд этишича, АҚШнинг Сурияни жаҳон молия тизимидан узиб қўйган санкцияларининг олиб ташланиши мамлакатда фаолият юритаётган гуманитар ташкилотларнинг фаолроқ иштирок этишига имкон беради, шунингдек, хорижий инвестициялар ва савдони қайта тиклашга имкон яратади.
Трампнинг ал-Шараа билан учрашуви 2025 йил 14 май куни Ар-Риёдда бўлиб ўтди. Оқ уйнинг хабар беришича, унда Саудия Арабистони валиаҳд шаҳзодаси ҳам иштирок этган, Туркия президенти эса телефон орқали қўшилган. Associated Press ёзишича, бу АҚШ ва Сурия раҳбарларининг сўнгги 25 йилдаги биринчи учрашуви.
Оқ уйнинг қайд этишича, Трамп Сурия президентига “ўз мамлакатида тарихий иш қилиш учун улкан имкониятга эгалигини” айтган. У ал-Шараага Исроил билан “Иброҳим келишувлари”га қўшилишни, хорижий террорчиларга Сурияни тарк этишга буйруқ беришни, фаластинлик террорчиларни депортация қилишни, АҚШга ИШИДнинг қайта тикланишига йўл қўймасликда ёрдам беришни, шунингдек, Сурия шимоли-шарқидаги ИШИД жангчиларини сақлаш марказлари учун жавобгарликни ўз зиммасига олишни тавсия қилган.
Сурия президенти Вашингтон ва Дамашқ терроризмга қарши кураш ва кимёвий қуролларни йўқ қилишда умумий манфаатларга эга эканлигини тасдиқлади. Оқ уй хабарига кўра, у Сурия Шарқ ва Ғарб ўртасидаги савдода муҳим бўғинга айланишига умид билдирди, шунингдек, Америка компанияларини Сурия нефти ва газига сармоя киритишга таклиф қилди.
Башар Асад режими 2024 йил декабрь ойи бошларида ал-Шараа бошчилигидаги “Ҳайят Таҳрир аш-Шом” исёнчи гуруҳи ҳужуми натижасида ағдарилган эди. Асад оиласи билан мамлакатдан қочиб кетди ва Россиядан бошпана олди. Ал-Шараа 2025 йил январида ўтиш даври учун Сурия президенти деб эълон қилинган эди.
