Фуқаро авиацияси халқаро ташкилоти (ICAO) кенгаши 2014 йил июль ойида Украинанинг Донецк вилояти осмонида Амстердамдан Куала-Лумпурга қараб парвоз қилаётган Malaysia Airlines авиакомпаниясининг MH17 рейсига қарашли Boeing 777 самолётининг ҳалокати учун Россияни расман жавобгар деб топди. Бу ҳақда ташкилот сайтида хабар қилинди.
Хабарда айтилишича, кенгаш Россия ўз ҳаракатлари билан Фуқаро авиацияси тўғрисидаги Чикаго конвенциясининг давлатларга парвоз вақтида фуқаролик ҳаво кемаларига қарши қурол қўллашни тақиқловчи қоидасини бузганлигига рози бўлган.
Қарор 2025 йил 12 май куни ICAO кенгаши аъзоларининг овоз бериши натижасида қабул қилинди. 193 давлат аъзоси бўлган БМТ муассасаси ҳисобланган ICAOга бу иш 2022 йилда Австралия ва Нидерландия ҳукуматлари томонидан юборилган эди. Иккала мамлакат ҳам кенгаш қарорини олқишлади.
Австралия ташқи ишлар вазири Пенни Вонгнинг баёнотида шундай дейилади: “Бу MH17 рейси ҳалокати қурбонлари, уларнинг оилалари ва яқинлари учун ҳақиқат, адолат ва жавобгарлик излашдаги тарихий лаҳзадир… Биз Россияни ниҳоят ушбу даҳшатли зўравонлик акти учун жавобгарликни тан олишга ва халқаро ҳуқуқ талаб қилганидек, ўз ҳаракатлари учун зарарни қоплашга чақирамиз”.
Нидерландия ташқи ишлар вазири Каспар Вельдкамп ўз баёнотида “Бу қарор халқаро ҳамжамиятга давлатлар халқаро ҳуқуқни жазосиз буза олмаслиги ҳақида аниқ сигнал юборади”, – деб таъкидлади.
Malaysia Airlines авиакомпаниясининг Boeing 777 самолёти 2014 йил 17 июль куни Донбасс осмонида уриб туширилган эди. Натижада 298 киши ҳалок бўлган. Уриб туширилган лайнер бортидаги йўловчиларнинг аксарияти Нидерландия фуқаролари эди. Шунингдек, бортда Малайзия, Австралия, Индонезия, Буюк Британия ва бошқа бир қатор давлатлар фуқаролари ҳам бўлган.
Нидерландия, Австралия, Малайзия, Бельгия ва Украина вакилларидан иборат халқаро тергов гуруҳи MH17 Россиядан ўзини ўзи мустақил деб эълон қилган ДХР ҳудудига ҳалокатдан бироз олдин олиб кирилган Россиянинг “Бук” зенит-ракета комплексидан отилган ракета билан уриб туширилганини аниқлади. Терговчиларнинг таъкидлашича, Россия президенти Владимир Путиннинг шахсан ўзи ДХРга “Бук”ни етказиб бериш тўғрисида қарор қабул қилганига “жиддий асослар” мавжуд.
2022 йилда Гаага округ суди самолёт ҳалокатида ДХРнинг собиқ мудофаа вазири Игорь Стрелков ва яна икки кишини айбдор деб топди ва уларни сиртдан умрбод қамоқ жазосига ҳукм қилди.
