2025 йил 10 апрель куни ижтимоий тармоқларда ZEEKR 001 русумли электромобилнинг ёнғини билан боғлиқ хабарлар тарқалди ва турли тахминларга сабаб бўлди. Электромобиль Tokbor қувватлаш шохобчасида турган ҳолатда ёнғин бошланган ва Tokbor компанияси томонидан қуйидаги мурожаат қолдирилган:
Бугун, 2025 йил 10 апрель куни, ZEEKR 001 русумли электромобилида ёнғин содир бўлди. Ҳозирги кунга қадар олинган маълумотларга кўра, ёнғин ҳодисаси қуйидаги ҳолатларда юзага келган.
Электромобиль халқлар дўстлигидаги қувватлаш станциясига 10 апрель куни тун соат 01:44 да келган ва 01:46 да қувватланиш учун старт тугмаси босилган. Ушбу вақтда автомобилнинг батареяси 7% қувватга эга эди. Қувватлаш жараёнида автомобиль 03:51 да электромобил станциясига тўхташ командасини юборган. Бир сониядан сўнг станция қувватлашни ва электромобилга ток юбориш жараёнини тўхтатган.
Электромобиль, қувватлаш станциясида 3 соатдан ортиқ муддатда қолганидан сўнг, эрталаб соат 07:31 да электромобилнинг олд қисмидан тутун чиқиши кузатилган ва у ёнишни бошлаган. Бу ҳодиса билан боғлиқ видео тасвирлар мавжуд бўлиб, улардан ёнғин бошланиши аниқ кўринмоқда.
Яна бир муҳим маълумот шуки, электромобиль ҳайдовчиси сўзларига кўра, 2025 йил 25 январдан 15 февралгача ушбу автомобиль Тошкентдаги автосервисларидан бирида таъмирланган. Ушбу давр мобайнида электромобилнинг аккумулятор блокини очиш йўли билан унинг ячейкаларини балансировка қилиш хизмати кўрсатилган.
Бугунги ҳолат бўйича давлат экспертизаси тайинланган ва унинг натижалари бўйича расмий эълон қилинади.
Келгусида, давлат экспертизаси натижалари эълон қилиниши билан, ёнғиннинг аниқ сабабларини ўрганиш давом этади.
