Ўзбекистон бош вазири Абдулла Арипов хизмат машинасини Mercedes-Benz дан Malibu га алмаштирди. Бу ҳақида «Газета.uz»нинг сўровига жавобан ҳукумат раҳбарининг матбуот котиби Бекзод Ҳидоятов маълум қилди.
2025 йил 7 март куни Абдулла Арипов видеоселектор йиғилишини ўтказиб, барча мансабдор шахсларга хорижий хизмат машиналаридан воз кечишни топширди.
«Президент топшириқ берди — биз уни муҳокамасиз бажаришимиз шарт. Кимдир буни 20 мартдан ёки 1 апрелдан жорий этишни таклиф қилмоқда, лекин бундай бўлмайди. Агар президент фармойиши бўлса, у дарҳол бажарилиши керак. Бу ҳукуматнинг асосий вазифаси», — деди бош вазир.
Матбуот котибининг сўзларига кўра, барча вазирликлар, идоралар, Қорақалпоғистон Республикаси Вазирлар Кенгаши, вилоят ва Тошкент шаҳар ҳокимликлари аллақачон «маҳаллий автомобиллар»га ўтган.
Хусусан, вазир ўринбосарлари ҳозирда Malibu русумли хизмат машинасидан, вилоят ҳокимлари эса Tahoe ёки Traverse автомобилларидан фойдаланмоқда.
Бекзод Ҳидоятов барча автомобиллар янги эмас, балки ҳозирги транспорт қисмидаги (гараждаги) мавжуд машиналар эканини қайд этди.
Илгари хизмат мақсадларида фойдаланилган автомобиллар босқичма-босқич E-auksion электрон савдо платформаси орқали сотувга қўйилади.
Мавжуд маълумотларга кўра, Сенат раиси Танзила Норбоева ва Қонунчилик палатаси спикери Нуриддин Исмоилов ҳам ҳозирда Malibu дан фойдаланмоқда, ҳудудларга хизмат сафарлари чоғида эса Chevrolet Tahoe да юрмоқда.
Эслатиб ўтамиз, 2025 йил 5 март куни Коррупцияга қарши курашиш бўйича Миллий кенгашнинг кенгайтирилган йиғилишида президент Шавкат Мирзиёев хизмат транспорт воситаларидан фойдаланишни қисқартириш ҳамда маҳаллий автомобиллар ва мебел га ўтиш бўйича топшириқ берган эди.
