Давлат активларини бошқариш агентлиги Chevrolet автомобиллари учун эҳтиёт қисмлар ишлаб чиқарувчи Uz-Koram Co (Uz-Koram Kompani) компаниясининг 100% улуши 24 млн АҚШ долларига Бирлашган Араб Амирлигининг (БАА) Centrum Aviation FZCO компаниясига сотилганини маълум қилди.
Сотув жараёни
Uz-Koram Co компаниясини хусусийлаштириш жамоатчиликка очиқ таклиф асосида ўтказилди. Бу жараёнда Portfolio Investment маслаҳатчи сифатида қатнашди. Сотиб олишга қизиқиш билдирган бешта маҳаллий ва халқаро инвесторлар, жумладан Европа, Осиё ва МДҲ давлатларидан аризалар келиб тушган.
Тўртта иштирокчи таклиф берди, бир ариза эса молиявий имконияти етарли эканини тасдиқловчи ҳужжатлар етмагани сабабли рад этилди. Натижада фақат икки компания барча талабларни тўлиқ бажариб, таклиф тақдим этди.
БААнинг Centrum Aviation FZCO компанияси 24 млн долларлик таклиф билан танлов ғолиби деб топилди. Давлат активлари агентлигининг маълумотига кўра, бу таклиф маслаҳатчи томонидан ҳисобланган индикатив баҳолашнинг юқори чегарасига мос келади ва компаниянинг баҳоланган қийматидан юқори.
Шартлар ва мажбуриятлар
Centrum Aviation FZCO Uz-Koram Co компаниясининг асосий фаолиятини камида 10 йил давомида сақлаб қолиш, General Motors тасдиқлаган техник қўллаб-қувватлаш лицензион шартномаларини бажариш ва технологиялар билан боғлиқ талабларга риоя қилиш мажбуриятини олди.
Шартнома ва хусусийлаштириш натижалари Давлат комиссияси томонидан маъқулланди.
Uz-Koram Co ҳақида
Uz-Koram Co компанияси 1998 йилда Корея Республикаси сармоядорлари билан ҳамкорликда ташкил этилган. У «Ўзавтосаноат» таркибига киради ва ҳар йили 250 мингдан ортиқ олд ва орқа бамперлар, панеллар ва бошқа автодеталлар ишлаб чиқаради.
Компания ишлаб чиқаришнинг тўлиқ технологик жараёнини ўз ичига олади. Бу жараён маҳсулот ишлаб чиқариш, бўяш ва йиғиш босқичларини қамраб олади. Uz-Koram Co Ўзбекистондаги энг йирик пластик маҳсулотлар ишлаб чиқарувчи компаниялардан бири ҳисобланади.
Компаниянинг устав капитали 10.3 млрд сўмни ташкил этади. Хусусийлаштиришдан олдин 100% улуш Uzavtocomponents га тегишли бўлган. Uz-Koram Co 2024 йил апрель ойида давлат хусусийлаштириш дастурига киритилган эди.
Харидор ҳақида
Centrum Aviation FZCO 2021 йилда БААнинг Дубай эркин иқтисодий зонасида (Dubai Airport Free Zone) ташкил этилган. Компания Centrum Holding таркибига киради ва юк ташиш авиацияси, авиация савдо брокерлиги ва ҳаво кемаларини ижарага бериш билан шуғулланади.
Ўзбекистонда компания Centrum Air бренди остида авиация хизматларини ва Uzlogistic бренди орқали UzAuto Motors билан биргаликда логистика хизматларини тақдим этади.
FZCO (Freezone Company) — БААдаги эркин иқтисодий зоналарда рўйхатга олинувчи чекланган жавобгарлик жамияти бўлиб, солиқлардан 50 йилга озод қилинган. Бундай компаниялар тўлиқ хорижий инвесторларга тегишли бўлади ва солиқ тўламайдиган ташкилотлар сифатида фаолият юритади.
