Etihad Airways авиакомпанияси 2026 йил 10 августдан бошлаб Абу-Даби ва Тошкент ўртасида мунтазам қатновларни йўлга қўймоқда, деб хабар берди Uzbekistan Airports матбуот хизмати.
БАА миллий авиаташувчиси қатновларни Airbus A320 ҳаво кемаларида ҳар куни амалга оширишни режалаштирмоқда.
«Etihad Airways компаниясининг Ўзбекистон бозорига кириб келиши мамлакат халқаро авиақатновини ривожлантириш учун муҳим воқеа ҳисобланади. Авиакомпания Яқин Шарқдаги энг йирик ташувчилар қаторига киради ва кенг йўналишлар тармоғига эга», — деб таъкидлади Uzbekistan Airports.
Шу тариқа, ўзбекистонлик йўловчилар Абу-Дабидаги халқаро ҳабга кириш имкониятига эга бўладилар ва Форс кўрфази давлатлари, Осиё, Европа, Африка, Австралия ҳамда Шимолий Америка йўналишларига парвозларни боғлаш имкониятини қўлга киритадилар.
Etihad Airways 2025 йилнинг июль ойида йўналишлар тармоғини, жумладан Тошкентни ҳам қамраб олган ҳолда кенгайтириш режаларини маълум қилган эди. Авиакомпания хабарига кўра, парвозларнинг бошланиши 2026 йилнинг мартида ҳафтасига олти марталик даврийлик билан кутилган эди.
Etihad Airways авиакомпаниясига Ўзбекистонга мунтазам қатновларни амалга ошириш учун рухсатнома 2025 йилнинг октябрь ойида берилган. Абу-Даби — Тошкент — Абу-Даби йўналиши бўйича парвозлар Airbus A320 ва A321 самолётларида амалга оширилиши режалаштирилган эди.
2026 йил март ойида транспорт вазири ўринбосари Жасурбек Чориев ва Etihad Airways авиакомпаниясининг бош оператив директори Мажед Аль-Марзуки мунтазам қатновларни йўлга қўйиш режаларини муҳокама қилдилар.
Ўзбекистон Транспорт вазирлиги маълумотларига кўра, томонлар парвозларни 17 августдан бошлаш бўйича келишиб олган эди. Бундан ташқари, Etihad Airways ва Uzbekistan Airways ўртасида интерлайн ва код-шеринг битимларини тузиш бўйича музокаралар олиб борилган.
2020 йилнинг сентябрь ойида «Ўзавиация» агентлиги Etihad шўъба корхонаси — Air Arabia компаниясига ушбу йўналишда мунтазам қатновларни амалга ошириш учун рухсатнома берган эди. Парвозлар ўша йилнинг декабрь ойидан ҳафтасига икки марталик даврийлик билан йўлга қўйилган.