Ўзбекистонда коррупцияга оид жиноятларда айбдор деб топилган шахсларнинг электрон реестри яратилмоқда. Бу ҳақда 2026 йил 22 июнь куни президент томонидан имзоланган қонунда сўз боради.
Ҳужжат билан коррупцияга оид жиноятлар рўйхати тасдиқланди. Реестр Коррупцияга қарши курашиш агентлиги томонидан Ички ишлар вазирлиги билан ҳамкорликда юритилади.
ИИВ айблов ҳукми ёки ажрим қонуний кучга кирганидан кейин уч иш куни ичида бундай шахслар ҳақидаги маълумотларни киритиши шарт бўлади. Маълумотлар реестрда Жиноят кодексида белгиланган судланганлик муддати давомида сақланади.
Электрон реестрга киритилган шахслар қуйидагиларга ҳақли бўлмайди:
- давлат хизматига кириш ва давлат мукофотларини олиш;
- сайланадиган ва алоҳида тартибда тайинланадиган лавозимларга номзодларни кўрсатиш;
- давлат органлари ҳузуридаги жамоатчилик кенгашларида ва идоралараро коллегиал органларда иштирок этиш;
- ўзлари ташкил этган компаниянинг устав фондида 50 фоиздан ортиқ улушга эга бўлган тадбиркорлар учун давлат харидлари ва давлат-хусусий шериклик лойиҳаларида иштирокчи сифатида қатнашиш;
- давлат улуши 50 фоиздан юқори бўлган ташкилотларда ва давлат таълим муассасаларида раҳбарлик лавозимларини эгаллаш.
Реестрдан маълумот олиш ва ундан чиқариш тартиби қонунчилик билан белгиланади.
Коррупцияга оид жиноятлар учун судланган шахслар реестрини яратиш президентнинг 2021 йил 6 июлдаги фармонида назарда тутилган эди. Тегишли қонун лойиҳаси 2022 йилнинг бошида ишлаб чиқилган бўлиб, 2023 йилда вазирлик ва идоралар билан келишилган.
2024 йил сентябрь ойида Қонунчилик палатаси депутати Умида Раҳмонова 2023 йилда илгари коррупцияга оид жиноятлар учун судланган 566 нафар шахс яна давлат хизматига қабул қилингани ва такроран коррупциявий жиноятлар содир этганини маълум қилган эди.