Ўзбекистон терма жамоаси ҳимоячиси Абдуқодир Ҳусанов Колумбияга қарши Жаҳон чемпионати ўйини вақтида жабрланган операторга дастхати туширилган ва «I am sorry» («Кечирасиз») деб ёзилган футболкасини юборди. Бу ҳақда Ўзбекистон футбол ассоциацияси хабар берди.
Ҳодиса 18 июнь куни бўлиб ўтган К гуруҳидаги учрашувнинг биринчи бўлимида содир бўлган. «Манчестер Сити»нинг 22 ёшли футболчиси ён чизиқ ёнида Колумбия терма жамоаси ҳужумчиси Луис Диас билан тўп учун курашишга уринаётганда, трансляция камераси оператори билан тўқнашиб кетган.
Операторга тиббий ёрдам кўрсатилган, шундан сўнг у шифохонага олиб борилган.
Кейинчалик Ўзбекистон футбол ассоциацияси вакиллари жабрланувчини бориб кўришди ва унга Ҳусановнинг имзоси қўйилган футболкани топширишди. Футболчи, шунингдек, операторга тезроқ соғайиб кетишини тилади.
«Ҳимоячимиз операторга тезроқ соғайиб кетишини тилади ва ўзининг самимий тилакларини йўллади», дейилади ассоциация хабарида.
Ушбу вазият учун Ҳусанов сариқ карточка олди. Ўзбекистон терма жамоаси ўз тарихидаги илк Жаҳон чемпионати ўйинида Колумбияга 1:3 ҳисобида имкониятни бой берди.
Терма жамоа устози Фабио Каннаваро ўз футболчилари билан фахрланишини маълум қилди. У «Газета»нинг олинган сабоқлар ҳақидаги саволига жавоб берар экан, жамоа рақиб голлар билан жазолаган хатоларни эсда тутиши кераклигини таъкидлади.
Ўзбекистон терма жамоаси навбатдаги ўйинини 23 июнь куни Португалияга қарши ўтказади. Учрашув Тошкент вақти билан соат 22:00 да бошланади.