БАА ҳукумати болаларнинг ижтимоий тармоқлардан фойдаланишини тартибга солувчи, жумладан, 15 ёшга тўлгунга қадар улардан фойдаланишни тақиқловчи қарор қабул қилди. Бу бундай чекловларни жорий этган биринчи араб давлатидир, деб қайд этади Reuters.
БАА ҳукумати матбуот хизмати хабарига кўра, 15 ёшга тўлмаган болаларга ижтимоий тармоқ платформаларида шахсий аккаунтлар яратиш ёки улардан фойдаланиш, шунингдек, ушбу платформаларнинг барча функцияларидан фойдаланиш, жумладан, хабарлар нашр этиш, шарҳ қолдириш, маълумот алмашиш ва оммавий гуруҳларга аъзо бўлиш тақиқланади.
«Бу қадам БААнинг глобал рақамли ўзгаришларга ҳамқадам бўлган ва болалар хавфсизлигини ўз устувор йўналишлари қаторига қўядиган илғор қонунчилик моделларини ишлаб чиқишга интилишини акс эттиради», — деб таъкидлади ҳукумат.
15 ёшдан 16 ёшгача бўлган болалар учун контентнинг ёш таснифи, ўзаро алоқаларни чеклаш, тартибга солинадиган фойдаланиш вақти ва ота-она назорати ҳисобга олинган ҳолда платформалардан тартибга солинадиган ва хавфсиз фойдаланиш имконияти таъминланиши керак, дейилади қарорда.
Платформалар зиммасига ёшни текширишнинг «аниқ ва ишончли» механизмларини жорий этиш, шунингдек, талабларга жавоб бермайдиган ҳисоб қайдномаларини кузатиб бориш ва «дарҳол чоралар кўриш» мажбурияти юкланди.
Қоидалар БААдаги фойдаланувчилар учун очиқ бўлган барча платформаларга тааллуқли. Ижтимоий тармоқларга талабларни бажариш учун 12 ой муддат берилди, ушбу вақт давомида улар тегишли давлат органлари билан мувофиқлаштирилган ҳолда янги стандартларни жорий этишлари керак бўлади.
16 ёшга тўлмаган болалар учун ижтимоий тармоқлардан фойдаланишни тўлиқ тақиқлашни биринчи бўлиб 2025 йил декабрь ойида Австралия жорий этган эди. Шунга ўхшаш чоралар ҳозирда бир қатор Европа давлатларида, жумладан Франция, Испания ва Данияда кўриб чиқилмоқда. Канада ва Туркия ҳам ижтимоий тармоқлардан фойдаланишни чеклашни режалаштирмоқда. 15 июнь куни Буюк Британия ҳам 16 ёшга тўлмаган болалар учун ижтимоий тармоқлардан фойдаланишни тўлиқ тақиқлаш жорий этилишини эълон қилди.