Ўзбекистон Марказий банкининг инфляция прогнозида электр энергияси ва табиий газ тарифларининг 10 фоизгача оширилиши эҳтимоли ҳисобга олинган. Бу ҳақда 2026 йил 29 апрель куни бўлиб ўтган матбуот анжуманида МБ раиси Тимур Ишметов маълум қилди.
«Инфляция прогнозида давлат томонидан тартибга солинадиган барча нархлар ҳисобга олинади. Биз ҳукумат билан доимий мулоқотдамиз. Прогноз шакллантирилаётганда энергия тарифлари ва коммунал тўловларнинг режалаштирилаётган ўсиши албатта эътиборга олинади», — деди.
МБ раиси ўринбосари Нодирбек Очиловнинг сўзларига кўра, регулятор ҳисоб-китобларида 10 фоизгача бўлган индексация аллақачон ҳисобга олинган, бироқ тарифларни ошириш тўғрисидаги қарорнинг ўзи ҳали қабул қилинмаган.
Тимур Ишметов тарифларнинг эҳтимолий оширилиши муддатлари ва параметрлари тўғрисидаги масалалар ҳукумат ваколатига киришини қўшимча қилди.
Аввалроқ Ўзбекистонда аҳоли учун энергия ресурслари тарифларини навбатдаги қайта кўриб чиқиш муҳокама қилинаётганини хабар қилинган эди. Унинг маълумотларига кўра, ҳукуматнинг иқтисодий блоки ва Иқтисодиёт ва молия вазирлиги газ ва электр энергияси нархини 9-10 фоизга ошириш бўйича таклиф тайёрлаган.
Индексация даражаси бўйича якуний қарор ҳали қабул қилинмаган. Маъқулланган тақдирда, янги тарифлар тегишли ҳужжат имзоланганидан кейин 15 кун ўтгач кучга кириши мумкин.
Ҳукумат қарорига мувофиқ, 2026 йилдан бошлаб ҳар йили 1 майдан энергетика ресурслари нархини инфляцияни ҳисобга олган ҳолда, лекин 10 фоиздан кўп бўлмаган миқдорда индексация қилиш механизми жорий этилади. Шу билан бирга, аввалроқ, 2024 йилдаги ҳужжатда тарифлар камида уч йилга ўзгаришсиз фиксация қилиниши кўзда тутилган эди.
2026 йил март ойида Ўзбекистонда йиллик инфляция 7,1 фоизгача пасайди. Марказий банк йил охиригача унинг янада секинлашиб, 6,5 фоизга етишини кутмоқда.
2024 йил 1 майдан Ўзбекистонда сўнгги 5 йилда — 2019 йил август ойидан бери биринчи марта электр энергияси ва газ нархлари оширилди ҳамда истеъмолнинг ижтимоий нормалари жорий этилди. Аҳоли учун ижтимоий норма доирасидаги электр энергиясининг базавий тарифи 1 кВт·соат учун 295 сўмдан 450 сўмгача (+52,5%), газ эса 1 кубометр учун 380 сўмдан 650 сўмгача (+71%) ўсди. Истеъмол ҳажми ортганда тарифлар сезиларли даражада ошади. 2025 йил 1 майдан тарифларнинг янги оширилиши юз берди.
Электр энергиясининг базавий қиймати яна 33,3 фоизга ошиб, 1 кВт·соат учун 600 сўмга етди, газ нархи эса 53,8 фоизга ортиб, 1 кубометр учун 1000 сўмни ташкил этди.