Чет элда истиқомат қилаётган ёки вақтинча бўлиб турган Ўзбекистон фуқаролари энди Ягона интерактив давлат хизматлари портали (my.gov.uz) орқали Ўзбекистоннинг элчихонаси ёки консуллиги қабулига ёзилишлари мумкин. Бу ҳақда портал матбуот хизмати хабар берди.
Қабулга ёзилиш учун «Элчихона (консуллик) қабулига ёзилиш» хизматини танлаш, керакли консуллик округи ва хизмат турини кўрсатиш, шундан сўнг календардан қулай бўлган бўш сана ҳамда вақтни танлаб, электрон навбат талонини олиш лозим бўлади.
Қабулга ёзилиш хизмати бепул тақдим этилади. Бунинг учун порталда авторизациядан ўтиш (янги фойдаланувчилар учун — рўйхатдан ўтиш) талаб қилинади. Турли мамлакатлардаги дипломатик ваколатхоналар томонидан кўрсатиладиган хизмат турлари бир-биридан фарқ қилади.
Белгиланган вақтда қабулга келинмаган тақдирда, қабул умумий асосларда ёки вақтни қайта белгилаш орқали амалга оширилади. Белгиланган вақтни бошқа шахсга бериб юбориш тақиқланади.