Саудия Арабистони майдонларида ўтаётган футбол бўйича ўсмирлар ўртасидаги Осиё Кубогининг дастлабки ярим финал учрашуви бўлиб ўтди. Унда Ўзбекистон U-17 терма жамоаси мусобақанинг бош фаворитларидан бири бўлган Япония вакилларига қарши баҳс олиб борди.
Учрашув кутилганидек шиддатли ва кескин курашларга бой ўтди. Ўйиннинг 28-дақиқасида ҳамюртимиз Асилбек Алиев рақиб дарвозасига белгиланган пенальтини аниқ амалга ошириб, ҳисобни очди ва жамоамизни олдинга олиб чиқди.
Шундан сўнг вакилларимиз учрашув охиригача ушбу устунликни сақлаб қолиш учун ҳаракат қилишди. Бироқ ҳакам томонидан қўшиб берилган вақтнинг сўнгги дақиқаларида, яъни 90+7-дақиқада япониялик футболчи Чимезиекаи гол уриб, мувозанатни тиклашга муваффақ бўлди.
Драматургияга бой бўлган ўйиннинг асосий вақти 1:1 ҳисобидаги дуранг билан тугади. Ғолибни аниқлаш учун белгиланган лотерея — пенальтилар сериясида эса омад кунчиқар юрт вакилларига кулиб боқди. Япониялик футболчилар зарбаларни 3:2 ҳисобида аниқроқ ижро этиб, турнирнинг финал йўлланмасини қўлга киритишди.
Шу тариқа, Сергей Чигодаев шогирдлари ярим финал босқичида ўз юришларини тўхтатиб, қитъа биринчилигидаги иштирокларини якунлашди.
Ўзбекистон U-17 — Япония U-17 1:1 (пенальтилар серияси: 2:3)