Футбол бўйича Ўзбекистон ўсмирлар терма жамоаси (U-17) Саудия Арабистонида ўтаётган U-17 Осиё Кубогининг ярим финалига йўл олди. Чорак финалда Сергей Чигодаев шогирдлари Корея Республикаси терма жамоасини пенальтилар сериясида мағлуб этди.
2026 йил 16 май куни Жидда шаҳрида бўлиб ўтган учрашувнинг асосий вақти 2:2 ҳисобидаги дуранг билан якунланди. Пенальтилар сериясида ўзбекистонлик футболчилар аниқроқ ҳаракат қилишди — 5:3.
Ўйинда ҳисобни Корея терма жамоаси очди. 22-дақиқада Мун Жи Хван жарима майдончаси марказида тўпни эгаллаб олди ва навбатдаги тўпни Ўзбекистон дарвозасига йўллади.
Ўзбекистон жамоаси 41-дақиқада ҳисобни тенглаштирди. Аҳрор Равшанбеков рақиб дарвозабонининг орқага узатилган тўпдаги хатосидан унумли фойдаланиб, тўпни бўш қолган дарвозага йўллади. Бу ҳужумчининг турнирдаги учинчи голи бўлди.
Биринчи бўлимга қўшиб берилган вақтда Равшанбеков дублни расмийлаштирди. У ўнг қанотдан олдинга ўтиб, бир нечта ҳимоячидан қочиб кетди ва аниқ зарба билан Ўзбекистонни олдинга олиб чиқди — 2:1.
Иккинчи бўлимда Корея терма жамоаси босимни кучайтирди ва 88-дақиқада ҳисобни тенглаштирди. Ан Сон Хён жарима майдончаси чизиғи яқинида узатмани қабул қилиб, тўпни дарвозага йўллади ва ўйинни пенальтилар сериясига ўтказди.
11 метрлик серия олдидан Ўзбекистон мураббийлар штаби майдонга захира дарвозабони Меҳрожбек Сирожиддиновни туширди. Айнан у Пак Кён Хуннинг зарбасини қайтариб, ўйиндан кейинги серия қаҳрамонига айланди. Ўзбекистоннинг барча беш футболчиси ўз имкониятларидан унумли фойдаланди.
Ярим финалда Ўзбекистон терма жамоаси турнирнинг тўрт карра ғолиби бўлган ва чорак финалда Тожикистонни тор-мор этган (5:0) Япония билан ўйнайди. Учрашув 19 май куни бўлиб ўтади ва Тошкент вақти билан соат 20:00 да бошланади.
Ўзбекистон U-17 терма жамоаси амалдаги Осиё чемпиони ҳисобланади. Аввалроқ жамоа 2026 йилнинг ноябрь ойида Қатарда бўлиб ўтадиган U-17 Жаҳон чемпионати йўлланмасини нақд қилган эди.