Ўзбекистонда ички йўналишлардаги поездлар ташувчининг айби билан кечикиб келган тақдирда йўловчиларга компенсация тўлаш тизимини жорий этиш режалаштирилмоқда. Рақобатни ривожлантириш ва истеъмолчилар ҳуқуқларини ҳимоя қилиш қўмитаси хабарига кўра, Ўзбекистон Транспорт вазирлиги тегишли лойиҳани ишлаб чиқмоқда.
Бунга фуқароларнинг мурожаатлари ва ижтимоий тармоқларда поездлар кечикиши билан боғлиқ шикоятлар сабаб бўлган. 2025 йилда қўмитага 51 та мурожаат келиб тушган. Хусусан, Тошкент — Бухоро — Тошкент йўналишидаги Sharq поездлари 40−60 дақиқага кечиккан ҳолатлар кузатилган, чипталардаги келиш вақти ҳақидаги маълумотлар эса нотўғри бўлган.
Маҳаллий йўналишларда поездлар кечикиши мунтазам равишда юз бермоқда. Сафарлардан бирида Sharq поезди 40 дақиқадан кўпроқ вақт давомида тўхтаб туришга мажбур бўлган — йўловчиларга бу тезюрар Afrosiyob поездини ўтказиб юбориш зарурати билан тушунтирилган.
Қўмита меъёрий-ҳуқуқий базани ўрганиш давомида амалдаги қонунчиликда ташувчининг айби билан поездлар кечиктирилган тақдирда йўловчиларга компенсация тўлаш кўзда тутилмаганини аниқлади.
Шу муносабат билан идора Транспорт вазирлигига ташиш қоидаларига ўзгартиришлар киритиш бўйича таклиф юборди. Ҳозирда темир йўл транспортида йўловчилар, багаж ва юк багажи ташиш қоидаларининг янги таҳрири ишлаб чиқилмоқда.
Лойиҳага кўра, ички йўналишларда (оддий ва тезюрар поездларда) компенсация миқдорини қуйидагича белгилаш таклиф этилмоқда:
- кечикиш 15 дақиқадан 30 дақиқагача бўлса — чипта нархининг 15 фоизи;
- 31 дақиқадан 60 дақиқагача — 25 фоизи;
- 61 дақиқадан 120 дақиқагача — 50 фоизи;
- 121 дақиқадан ортиқ бўлса — 100 фоизи.
Аввалроқ бундай тартиб фақат Afrosiyob тезюрар поездлари учун амал қилар эди. Эндиликда уни барча ички йўналишларга татбиқ этиш режалаштирилмоқда.