Жиноят ишлари бўйича Қоровулбозор туман суди Россия томонида туриб Украинадаги ҳарбий ҳаракатларда қатнашган 32 ёшли Ўзбекистон фуқароси А. О.га нисбатан ҳукм чиқарди.
Иш материалларига кўра, эркак 2021 йил сентябрь ойида Москва вилоятига ишлаш учун кетган. 2022 йил март ойида Россия суди уни ўғирлик учун 5 йилга озодликдан маҳрум қилган.
Барнаулдаги ахлоқ тузатиш муассасасида жазони ўташ вақтида ўзбекистонлик шахс урушда қатнашиш учун ёллаб олинган. А. О.нинг сўзларига кўра, ўша вақтда унга нисбатан турли хил босим ва зўравонликлар қўлланилган. Эркак шартномани мажбуран имзолаганини, шу билан бирга унга шартнома шартлари билан танишиш имконияти берилмаганини таъкидлади.
У Россия Мудофаа вазирлиги билан шартномани 2025 йил сентябрь ойида бир йил муддатга тузган.
Судланувчининг баёнотига кўра, 2025 йил октябрь ойида у Луганск вилоятига келган ва у ерда ҳарбий тайёргарликдан ўтган. 8 октябрь куни тайёргарлик жараёнида у яраланган — ўқ унинг ўнг елкасига теккан. Шундан сўнг у Луганскдаги ҳарбий госпиталга юборилган. У ерда эркак тахминан 20 кун даволанган, сўнгра госпиталдан қочиб, Ростовдаги Ўзбекистон консуллигига борган ва ходимларга бўлиб ўтган воқеалар ҳақида сўзлаб берган.
Дипломатик ваколатхона ходимлари унга ватанга қайтиш гувоҳномасини беришган, шу асосда А. О. Тошкентга учиб келган.
Судланувчи шартнома имзолаш вақтида унга 1,9 млн рубль (тахминан 300 млн сўм) миқдорида мукофот ваъда қилинганини, бироқ пулларни олмаганини айтди. Судда А. О. айбини тан олди, қилмишидан пушаймонлигини билдирди, қарамоғида икки нафар вояга етмаган фарзанди борлигини кўрсатди, шунингдек, соғлиғи ҳолатини инобатга олишни ва енгиллик беришни сўради.
Суд унга Жиноят кодексининг 154-моддаси 1-қисми (ёлланма жангчилик) билан 4 йил муддатга озодликни чеклаш жазосини тайинлади.
Унга яшаш жойини фақат иш учун зарур бўлган вақтда тарк этиш тақиқланди. Шунингдек, кафе, бар ва ресторанларга бориш, ўз уйидан ташқаридаги тўй ва тантаналарда қатнашиш, яшаш жойини ўзгартириш ҳамда Бухоро вилояти ҳудудидан ташқарига чиқиш тақиқланди.