2025 йилнинг июль ойидан буён Ўзбекистон Президенти администрацияси (ПА) Коммуникациялар департаменти бошлиғи ўринбосари лавозимида ишлаб келаётган Омонов Фаррух Фарходжонович бир вақтнинг ўзида Президент Халқ қабулхонаси раҳбари этиб тайинланди. Бу ҳақдаги фармонни Шавкат Мирзиёев имзолади.
Фаррух Омонов 1988 йилда туғилган. Тошкент давлат иқтисодиёт университети ва Президент ҳузуридаги Давлат бошқаруви академиясини тамомлаган.
Меҳнат фаолиятини Молия вазирлиги ва Савдо-саноат палатасида бошлаган. 2020 йил октябрь ойида Ёшлар ишлари агентлиги директори ўринбосари этиб тайинланган, бир йил ўтиб — 2021 йил декабрида эса ПАда Ахборот билан таъминлаш ва оммавий ахборот воситалари билан ҳамкорлик қилиш секторига раҳбарлик қилган.
Қабулхоналар фаолиятига танқид
Эслатиб ўтамиз, президент 2016 йилда ҳокимият тепасига келиши билан давлатнинг халқ билан мулоқотининг янги формати сифатида ишга туширилган Халқ қабулхоналари фаолиятини бир неча бор танқид қилган эди.
2025 йил июнь ойида Шавкат Мирзиёев қабулхоналарни мурожаатларни давлат органларига йўналтирувчи «диспетчерлик пункти» деб атаган эди. 2024 йилда келиб тушган мурожаатларнинг ярмидан кўпи ўз ечимини топмаган. Ўшанда у қабулхоналарнинг барча ходимларини «муаммоларни ҳал қила оладиган кадрлар» билан алмаштиришни эълон қилган, қабулхоналарга раҳбарлик қилиш эса вилоят ва туман ҳокимлари зиммасига юкланган эди.
2026 йил март ойида президент ҳузуридаги йиғилишда қабулхоналар иши яна муҳокама қилинди. У мамлакатда ҳар 10 минг аҳолига ўртача 319 та ариза ва шикоят тўғри келишини маълум қилди. Шу билан бирга, қатор ҳудудларда бу кўрсаткич анча юқори: Тошкентда у 535 тага тенг. Айрим туманларда, жумладан, пойтахтнинг Миробод туманида аризалар сони ўртача кўрсаткичдан 2 баравар кўп.
Юз минглаб мурожаатлар ҳал этилмай қолмоқда. Қатор ҳокимлар сайёр қабулларни «хўжакўрсинга» ўтказган. Ўтган йили мурожаатларнинг асосий қисми ички ишлар органларига — 148 мингта, Мажбурий ижро бюросига — 134 мингта, Энергетика вазирлигига — 88 мингта, Камбағалликни қисқартириш ва бандлик вазирлигига — 60 мингта, шунингдек, Соғлиқни сақлаш вазирлигига — 56 мингтани ташкил этган.
Шавкат Мирзиёев фуқароларни эшита билиш давлат органлари ишининг асосий тамойили бўлиши кераклигини таъкидлади. У фуқаролар мурожаатларига бефарқ қараш уларнинг давлатга бўлган ишончини пасайтиришидан огоҳлантирди.