Мобил алоқа операторларига фақат овозли алоқа ва (ёки) СМС хизматлари мавжуд бўлган тариф режаларини тақдим этиш мажбурияти юкланиши мумкин. Бундай таклиф Ўзбекистон Адлия вазирлиги томонидан тайёрланган ҳукумат қарори лойиҳасида кўзда тутилган.
Ушбу талабни телекоммуникация тармоқларини лойиҳалаш, қуриш, улардан фойдаланиш ва хизматлар кўрсатиш фаолиятини лицензиялаш шартларига киритиш таклиф этилмоқда.
Лойиҳага илова қилинган тушунтириш хатида қайд этилишича, ҳозирда мобил алоқа операторлари аксарият тариф режаларида интернет-трафикни ҳам қўшиб таклиф қилмоқдалар. Бироқ, бу хизмат абонентларнинг бир қисми учун керак бўлмаслиги мумкин, бу эса уларнинг харажатлари ортишига олиб келади ва танлов эркинлигини чеклайди, дейилади матнда.
Лойиҳа муаллифлари мисол тариқасида Beeline ва Oqmobile операторларини келтирган: улар хизматларни мустақил танлаш имконини берувчи «конструктор-тариф» таклиф қилса-да, у ерда ҳам интернет хизмати автоматик тарзда (default ҳолатда) қўшилган.
Шунингдек, хатда Буюк Британия ва АҚШда Talk & Text (сўзлашув ва хабарлар) тарифлари мавжудлиги, Хорватияда эса операторлар абонентларга алоқа турини хоҳишига кўра танлаш имконини бериши қайд этилган.
Лицензия олишнинг яна бир талаби сифатида тариф режалари номларига ойлик тўлов суммасига мос келадиган рақамларни киритмаслик мажбуриятини белгилаш таклиф этилмоқда. Адлия вазирлигининг фикрича, бу абонентларни чалғитади.
Масалан, тушунтиришда келтирилишича, 2023 йилда Mobiuz оператори нархи 35 минг сўм бўлган Jozibali 35 тарифини жорий қилган. Бироқ, 2025 йил февраль ойида ушбу сумма 45 минг сўмгача оширилган. Jozibali 50 тарифида эса тўлов 50 мингдан 55 минг сўмга кўтарилган.
2026 йил январь ойида Телекоммуникация хизматларини кўрсатиш қоидаларига киритилган ўзгартиришлар кучга кирган эди. Унга кўра, тарифни ўзгартириш бепул бўлди, баланснинг минусга тушиб кетишига тақиқ қўйилди, рақамни кўчириш жараёнини тезлаштириш имконияти пайдо бўлди ва пулли контент-хизматлар чекланди.