2026 йил 28 март куни АҚШда президент Дональд Трамп ва унинг маъмурияти сиёсатига қарши кенг кўламли норозилик намойишлари ўтказилди. Бу «Қиролларга йўқ» шиори остидаги учинчи акция бўлиб, аввалги иккитаси 2025 йилнинг июнь ва октябрь ойларида бўлиб ўтган эди, деб ёзмоқда CNN ва BBC News.
Ташкилотчиларнинг ҳисоб-китобларига кўра, кўчаларга 8 миллиондан ортиқ киши чиққан. Улар Трамп маъмуриятининг авторитар мойилликлари, иммиграция назоратининг кучайтирилиши, Эрон билан уруш ва яшаш таннархининг ошишига қарши норозилик билдиришди.
«Трамп бизни золим каби бошқармоқчи. Аммо бу — Америка ва ҳокимият ўзларини қирол деб эълон қилганларга ёки уларнинг миллиардер малайларига эмас, халққа тегишли», — деди ташкилотчилар.
Оқ уй вакили Эбигейл Жексон норозилик намойишларини «Трампга нисбатан ақлдан озиш терапияси сеанслари» деб атади ва бу фақат «ёритилиши учун пул тўланадиган журналистлар» учун муҳимлигини таъкидлади. Трампнинг ўзи ҳозирча бу акцияга изоҳ бермади.
Намойишлар АҚШнинг йирик шаҳарлари, жумладан, Нью-Йорк, Лос-Анжелес, Атланта ва Миннеаполис билан бир қаторда чекка ҳудудлар ва қишлоқ туманларида, шу жумладан республикачилар бошқарувидаги штатларда ҳам бўлиб ўтди. Протестлар, шунингдек, Италия, Франция, Германия ва Испанияда ҳам ташкил этилди.
Аввалги «Қиролларга йўқ» акцияларида бўлгани каби, намойишчилар Трамп, вице-президент Вэнс ва маъмуриятнинг бошқа мулозимларининг қўғирчоқларини кўтариб чиқишди ҳамда уларни истеъфога чиқишга ва ҳибсга олинишга чақиришди.
Энг йирик намойиш Миннесотада бўлиб ўтди, у ерда январь ойида федерал иммиграция агентлари АҚШнинг икки фуқароси — Рене Николь Гуд ва Алекс Преттини ўлдирган эди. Уларнинг ўлими Оқ уйнинг иммиграция сиёсатига қарши умуммиллий норозиликларга сабаб бўлди. Миннесота ва Нью-Йоркдаги митингларда таниқли маданият арбоблари ва таниқли демократ сиёсатчилар ҳам иштирок этди.
Ташкилотчилар ва полициянинг маълум қилишича, намойишлар асосан тинч руҳда ўтган. Лос-Анжелес полициясининг маълумотларига кўра, шаҳарда тарқалишдан бош тортгани учун 75 киши қўлга олинган.