Ўзбекистон президенти Шавкат Мирзиёевга 2026 йил 25 март куни нефть ва газ қазиб олишни барқарорлаштириш ҳамда янги конларни ўзлаштириш чора-тадбирлари тўғрисида ҳисобот берилди. Бу ҳақда нефть-газ тармоғини ривожлантиришга бағишланган тақдимот доирасида маълум қилинди.
«Ўзбекнефтгаз» бошқаруви раисининг биринчи ўринбосари Суҳроб Ҳамраев «Ўзбекистон 24» телеканалига берган интервьюсида биринчи чоракда бир қатор ишлар амалга оширилгани, йил якунига қадар эса янги вазифалар белгиланганини айтди.
«Биз жорий йилнинг биринчи чорагида амалга оширилган ишлар натижаларини, шунингдек, йил якунига қадар нефть ва газ захираларини кўпайтириш, қазиб олиш барқарорлигини таъминлаш ва углеводородларни чуқур қайта ишлаш бўйича қўйилган мақсадларни тақдим этдик», — деди.
«Ўзбекнефтгаз» компанияси 2025 йил якунларига кўра 25,2 млрд кубометр газ ишлаб чиқарган бўлиб, бу прогнозлардан паст. 2026–2027 йилларда қазиб олиш ҳажмининг барқарорлигини таъминлаш, шунингдек, газ захираларини кўпайтириш ва уни қайта ишлаш кўзда тутилган.
Табиий газ қазиб олиш бўйича расмий маълумотлардаги тафовутларга борлиги аниқланган эди. Саноат ишлаб чиқариши тўғрисидаги ҳисоботга кўра, 2025 йил якунлари бўйича Ўзбекистонда 42,3 млрд кубометр газ қазиб олинган — бу 2024 йилдагига (41,3 млрд) нисбатан 1 млрд кубометрга (2,4%) кўп.
Унинг сўзларига кўра, компания конларни ўзлаштириш самарадорлигини ошириш учун халқаро ҳамкорлар билан ҳамкорликни кенгайтирмоқда.
«Ҳозирги вақтда „Ўзбекнефтгаз“ акциядорлик жамияти амалдаги конларда газ захираларини максимал даражада самарали ўзлаштириш учун хорижий компаниялар билан ҳамкорлик қилмоқда. Илғор инновацион технологияларни жорий этиш учун юқори малакали халқаро ҳамкорларни, хусусан, АҚШнинг Boston Consulting Group, Schlumberger, Upwing компанияларини жалб қилиш режалаштирилган», — деб қайд этди Суҳроб Ҳамраев.
У Буюк Британиянинг BP (British Petroleum) компаниясининг Ўзбекистондаги лойиҳалардаги иштирокини алоҳида таъкидлади.
«Бундан ташқари, тўғридан-тўғри инвестицияларни жалб қилиш мақсадида Озарбайжоннинг SOCAR компанияси билан Устюрт платосида янги конларни ўзлаштириш бўйича қўшма лойиҳалар амалга оширилмоқда, шунингдек, Британиянинг British Petroleum компанияси иштироки [кутилмоқда]», — деб баёнот берди.
2025 йилнинг ноябрь ойида Энергетика вазирлиги «Газета»га Ўзбекистон Устюрт ҳудуди бўйича маҳсулот тақсимотига оид битимга (МТБ) BP компаниясини жалб қилиш имконияти юзасидан музокаралар олиб бораётганини маълум қилган эди. Ўшанда компаниянинг қизиқиши тасдиқланган, бироқ шу кунгача музокаралар натижалари ва унинг лойиҳадаги эҳтимолий иштироки ҳақида расман хабар берилмаган эди.
23 март куни Ўзбекистоннинг Буюк Британиядаги элчиси Равшан Усмонов British Petroleum халқаро ривожланиш департаменти раҳбари Майкл Денисон билан учрашув ўтказди.
Компания учта йўналиш — углеводородларни қидириш ва қазиб олиш, замонавий технологияларни жорий этиш ҳамда энергетика инфратузилмасини ривожлантириш бўйича узоқ муддатли ҳамкорликка қизиқиш билдирди. Томонлар эҳтимолий келишувларнинг аниқ муддатлари ва параметрларини ошкор қилишмади.
Учрашув Ўзбекистон ташқи ишлар вазири Бахтиёр Саидов ва BP раҳбарияти ўртасида 2026 йил 26 февраль куни бўлиб ўтган музокараларнинг давоми бўлди, унда асосий эътибор «Устюрт» лойиҳасига қаратилган эди.
Лойиҳа ҳақида
Ўзбекистон Энергетика вазирлиги, SOCAR ва «Ўзбекнефтгаз» 24 июль куни Устюрт ҳудуди бўйича маҳсулот тақсимотига оид битимни (МТБ) имзолаган эди. Ҳужжат бир қатор инвестиция блокларида геология-қидирув ишларини олиб бориш ва кейинчалик углеводородларни қазиб олишни назарда тутади. 5 йил давомида қидирув ишларини ўтказиш ва камида битта қидирув қудуғини бурғилаш режалаштирилган, бунда SOCAR лойиҳа оператори сифатида иштирок этади.
Ҳисоб-китобларга кўра, лойиҳа доирасида 100 млн тоннагача нефть ва 35 млрд кубометр газ аниқланиши мумкин. Режалаштирилган инвестициялар ҳажми 2 млрд долларга баҳоланмоқда.
Аввалроқ SOCAR ва Британиянинг BP компанияси ушбу ҳудудга қизиқиш билдирган эди: 2018 йилда компаниялар Устюртдаги блокларни биргаликда ўрганиш бўйича меморандум имзолаган эдилар.
BP стратегияси ўзгариши фонида 2021 йилда лойиҳадан чиққан эди, бироқ сўнгги вақтларда компания ўз ёндашувини қайта кўриб чиқмоқда ва яна углеводородларга эътиборни кучайтирмоқда.