2026 йил 1 майдан Ўзбекистонда Тошкент — Хива йўналиши бўйича Hyundai Rotem юқори тезликдаги поездини ишга тушириш режалаштирилган. 18 март куни Самарқанд вилоятининг Нарпай туманига ташрифи чоғида Президент Шавкат Мирзиёев янги ҳаракат таркибини синовдан ўтказди.
Транспорт вазири Илҳом Маҳкамов «Ўзбекистон 24» телеканалига берган интервьюсида маълум қилишича, мамлакат 6 та юқори тезликдаги поезд сотиб олган. Унинг сўзларига кўра, ҳаракатнинг йўлга қўйилиши инфратузилмани модернизация қилиш туфайли амалга ошди.
«Муҳтарам Президентимиз ташаббуслари билан биринчи навбатда Хивагача бўлган темир йўл линиясини электрлаштириш ва уни юқори тезликдаги поездлар ҳаракатига мослаштириш ишлари бажарилди. Натижада 1 майдан бошлаб Тошкент — Хива йўналишида поездлар ҳаракатини йўлга қўямиз», — деди вазир.
Йил якунига қадар яна бешта поезд келиши кутилмоқда.
«6 та поезднинг барчаси Хивагача қатнайди. Президент топшириғига биноан Нукусгача бўлган линияни электрлаштириш ишлари ҳам олиб борилмоқда, шундан сўнг Нукус йўналиши бўйича ҳам поездлар ҳаракатини ташкил этиш режалаштирилган», — дея қўшимча қилди Илҳом Маҳкамов.
Поезд таркиби оқ рангда бўлиб, ойналари қорайтирилган ҳамда Ўзбекистон байроғига ишора қилувчи мовий, яшил ва қизил рангли чизиқлар билан безатилган.
Саркарда Жалолиддин Мангуберди номи берилган ушбу поезд етказиб берилиши керак бўлган 6 та таркибнинг биринчиси. У 7 та вагондан иборат бўлиб, тахминан 390 йўловчига мўлжалланган ва соатига 260 км тезликка чиқа олади. Йўловчилар учун хизмат кўрсатишнинг учта тоифаси — VIP, бизнес ва эконом класси мавжуд бўлади.
Қайд этилишича, узунлиги 175 метр бўлган поезд мамлакат иқлим шароитига мослаштирилган: у чангга, ҳароратнинг кескин ўзгаришига ва қум бўронларига чидамли. Яқин вақт ичида уни Тошкент — Урганч — Хива йўналишида ишга тушириш режалаштирилган бўлиб, бу йўл вақтини ҳозирги 13 соатдан зиёд вақтдан тахминан 7 соатгача қисқартиради.
Hyundai Rotem юқори тезликдаги электропоездларини етказиб бериш бўйича шартнома 2024 йил июнь ойида Жанубий Корея президентининг Ўзбекистонга ташрифи чоғида имзоланган эди. Лойиҳанинг умумий қиймати 220,03 млн еврони ташкил этади. Ушбу суммадан 21,3 млн еврони Ўзбекистон, яна 13,5 млн еврони «Ўзбекистон темир йўллари» ажратади, асосий қисми — 185,18 млн евро эса Корея Эксимбанки томонидан 10 йиллик имтиёзли давр билан 40 йил муддатга узоқ муддатли заём сифатида тақдим этилади.
Қолган 5 та поездни 2026–2027 йиллар давомида етказиб бериш кўзда тутилган. Уларни эксплуатация қилиш учун узунлиги 465 км бўлган Бухоро — Урганч — Хива темир йўл линияси электрлаштирилди (бунинг учун 162 млн ва 108 млн долларлик кредитлар жалб қилинган).
Яқин йилларда 196 километрлик «Мискин — Нукус» линияси ҳам электрлаштирилади. Натижада Тошкентдан Нукусгача бўлган йўл вақти 16 соатдан 7 соатгача қисқаради.