Жиноят ишлари бўйича Ангрен шаҳар судида 2026 йил 13 март куни 15 ёшли қизни зўрлаб келган 4 нафар йигитга нисбатан суд жараёни якунланди. Бу ҳақда Олий суд матбуот котиби Азиз Обидов маълум қилди.
2025 йил ноябрь ойида бошланган суд жараёни жинсий жиноятларга оид иш кўрилгани сабабли ёпиқ тарзда ўтказилди. Судда С. К. (2006 йилда туғилган), З. У. (2004 йилда туғилган), Д. У. (2004 йилда туғилган) ва А. У. (2003 йилда туғилган) судланувчи сифатида иштирок этди.
Судланувчиларга оид ҳукмлар
Суд қарори билан тўрттала шахс ҳам Жиноят кодексининг қуйидаги моддаларида назарда тутилган жиноятларни содир этганликда айбдор деб топилди:
- 118-модда 3-қисми «а» банди (18 ёшга тўлмаган шахсни зўрлаш);
- 119-модда 3-қисми «а» банди (18 ёшга тўлмаган шахсга нисбатан зўрлик ишлатиб, қўрқитиб ёки жабрланувчининг ожизлигидан фойдаланиб, жинсий эҳтиёжни ғайритабиий шаклда қондириш).
Шунингдек, 28-модда (Жиноятда иштирокчилик) ҳам қўлланган.
С. К.га (жиноят содир этилган вақтда вояга етмаган бўлган) 10 йил, З. У.га 12 йил, Д. У.га 10 йил 6 ой, А. У.га (II гуруҳ ногирони) 7 йил 6 ой муддатга озодликдан маҳрум қилиш жазоси тайинланди.
Суд жараёни тафсилотлари
Болалар омбудсмани Сурайё Раҳмонованинг маълумотига кўра, тергов ва суд давомида жабрланувчининг руҳий ҳолатига алоҳида эътибор қаратилган.
Қўшимча руҳий жароҳат етказмаслик мақсадида жараёнга малакали педагог ва психологлар жалб этилди. Мутахассисларнинг доимий қўллаб-қувватлаши натижасида ҳозирда қизнинг эмоционал ҳолати барқарорлашган, деб қайд этди Болалар омбудсмани.
Жабрланувчининг тақдири
Суд иши давомида қизнинг онаси ўз ота-оналик мажбуриятларини мунтазам равишда бажармай келгани аниқланди. Шу сабабли у оналик ҳуқуқидан маҳрум қилинди. Судда қизнинг манфаатларини «Инсон» ижтимоий хизматлар маркази ходимлари ҳимоя қилди.
Болалар омбудсмани қизнинг реабилитация жараёнини мониторинг қилишда давом этишини ва унинг учун барқарор оилавий муҳит таъминланишига кўмаклашишини таъкидлади.
Ушбу ҳолат 2025 йилнинг июль ойида фаол Саодат Абдузакированинг нашрлари орқали маълум бўлган эди. У Ангрен шаҳар болалар шифохонасига юқори иситма ва оғир жароҳатлар билан ётқизилган қиз ҳақида хабар берган. Шифохонага келтирилган вақтда боланинг вазни бор-йўғи 28 кг бўлган.
Блогернинг сўзларига кўра, қиз 14 ёшида қариндоши томонидан зўрланган, кейинчалик эса бир гуруҳ йигитлар томонидан зўрлаб келинган — улардан бири вояга етмаган, қолган уч нафари 20 ёшдан 24 ёшгача бўлган шахслар.
Тергов давомида айбланувчилар воқеа жойида жабрланувчи билан нималар қилишганини кўрсатиб беришган, бироқ қиз гўёки жинсий алоқага рози бўлганини даъво қилишган. Зўрлашдан сўнг, агар кимгадир айтса, уни «кўмиб юборишлари» билан қўрқитишган.
Шифохонада қизни Болалар омбудсмани Сурайё Раҳмонова бориб кўрган эди. Ўшанда ўсмирда ўткир артрит, икки томонлама бронхопневмония, оқсил-энергия етишмовчилиги, оғир даражадаги анемия ва сепсис аниқлангани маълум қилинганди. Болага, шунингдек, шаҳар «Инсон» ижтимоий хизматлар маркази ходимлари ҳам ёрдам кўрсатишган.
2025 йил ноябрь ойида суд бошланган вақтда қиз Тошкентда даволанаётган эди. Ўша пайтга келиб унинг аҳволи яхшиланган.