Жиноят ишлари бўйича Тошкент шаҳар Чилонзор тумани суди 2024 йил май ойида Лутфий кўчасида соатига қарийб 100 км тезликда ЙПХ инспекторини қасддан уриб юборган 24 ёшли BYD Han ҳайдовчисини 6 йил муддатга озодликдан маҳрум қилиш жазосига ҳукм қилди. Бу ҳақда «Milliy TV» телеканалининг «Millar» дастури хабар берди.
Воқеа содир бўлган куни кечқурун инспектор Ҳумоюн Шарипов ҳаракатланиши шубҳа уйғотган BYD Han (давлат рақами 10 Y 070 GB, Тошкент вилояти) автомобилига эътибор қаратган. У ҳуштак ва жезл ёрдамида ҳайдовчига тўхташ ишорасини берган.
Ҳайдовчилик гувоҳномаси ва транспортни бошқариш ҳуқуқига эга бўлмаган ҳайдовчи инспекторнинг талабларига бўйсунмай, ҳаракатни давом эттирган. 150-200 метрдан сўнг у орқага қайрилган. ЙПХ ходими яна тўхташ ишорасини бериб, транспорт воситалари ҳаракатини тўхтатган. Бироқ О. А. тўхтаб турган машиналарни айланиб ўтмоқчи бўлиб, инспекторни уриб юборган.
Ҳумоюн Шарипов тўқнашувдан қочишга ҳаракат қилган, бироқ улгурмаган. Зарб оқибатида у учиб кетган. Инспектор иккала сон суягининг синиши ва бошқа жароҳатлар билан шифохонага ётқизилган. Унинг отаси телеканалга берган интервьюсида ўғлининг суяклари тўрт жойидан синганини айтди. Инспектор 8 кун реанимацияда бўлган, 34 кундан кейин ҳушига келган.
6 ой давомида у ётиб даволанган. Бир йил ўтиб яна ишлай бошлаган. Бироқ у ҳалигача даволанишга мажбур — ҳозир ҳам шифохонада. Судланувчи томони шу вақт ичида ҳеч қандай ёрдам бермаган, дейди марҳумнинг отаси.
Суд айбланувчини Ўзбекистон Жиноят кодексининг 104-моддаси 2-қисми «б» банди (хизмат бурчини бажариши муносабати билан шахсга қасддан баданга оғир шикаст етказиш) ҳамда 219-моддаси 2-қисми (ҳокимият вакилини ҳар қандай шаклда хизмат вазифаларини бажаришдан воз кечишга мажбур қилиш) билан айбдор деб топди.
Моддалар мажмуи бўйича суд О. А.ни 6 йил муддатга озодликдан маҳрум қилди. Дастлабки ҳибсда сақланган кунлар ва ахлоқ тузатиш ишлари ижроси ҳисобга олиниб, жазо муддати 5 йил 2 ой 9 кун этиб белгиланди.
Судланувчи муносиб хулқ-атворда бўлиш ҳақидаги тилхат асосида озодликда эди. У суд залида қамоққа олинди. Инспекторнинг отаси 1,5 йил давомида иш бир нечта суд инстанцияларидан ўтганини сўзлаб берди.