«Ўзбекнефтгаз» давлат нефть-газ компанияси ва Хитойнинг XIBU компанияси 2026–2027 йилларда Ўзбекистонда 30 та қудуқни бурғилаш бўйича шартнома имзолади. Бу ҳақда компания матбуот хизмати хабар берди.
Келишув узоқ муддатли ҳамкорликнинг биринчи босқичи бўлди. Аввалроқ China National Petroleum Corporation (CNPC) таркибига кирувчи Хитой компаниясига 2026–2029 йилларда Ўзбекистонда жами 105 та қудуқни бурғилаш таклиф этилган эди.
Ҳужжатни имзолаш «Ўзбекнефтгаз» бошқаруви раиси Абдуғани Сангиновнинг Хитойга хизмат сафари якунлари бўйича бўлиб ўтди, у ерда нефть-газ соҳасининг етакчи компаниялари билан музокаралар ўтказилди, дейилади хабарда. Лойиҳа доирасида Ўзбекистонга юк кўтариш қуввати 450 тонна бўлган 10 та бурғилаш қурилмасини етказиб бериш режалаштирилган.
Компания маълумотларига кўра, янги қудуқлар сейсмик тадқиқотлар натижасида аниқланган истиқболли майдонларда бурғиланади. Уларнинг чуқурлиги 5500–6000 метрдан ошиши мумкин. Бундан ташқари, аллақачон бурғиланган қудуқларда мураккаб геологик шароитлар — 1000 атмосферагача босим ва 200 °C гача ҳарорат кузатилмоқда.
«Ўзбекнефтгаз»да таъкидланишича, лойиҳа геология-қидирув ишларини кенгайтириш, газ захираларини кўпайтириш ва мамлакат энергетика хавфсизлигини оширишга қаратилган.
XIBU Drilling Engineering Company илгари ҳам Ўзбекистонда ишлаган. Хусусан, у Бухоро вилоятидаги Қоракўл инвестиция блокининг газ конларида 11 та эксплуатация қудуғини қуриш билан шуғулланган. Компания, шунингдек, Андижон вилоятидаги нефть конини ўзлаштиришда иштирок этган.
Бунга қадар «Ўзбекнефтгаз» лойиҳаларининг бурғилаш ишларида тадбиркор Бахтиёр Фозиловга алоқадор бўлган Eriell компанияси иштирок этган эди. Ишларнинг аксарият қисми «2017–2021 йилларда углеводород хомашёсини қазиб олишни кўпайтириш чора-тадбирлари дастури» лойиҳаси доирасида амалга оширилган.
Аввалроқ Ўзбекистон ҳукумати иш ҳақи бўйича қарзларни (тахминан 131 млн доллар), шунингдек, бюджет ва банклар олдидаги мажбуриятларни қоплаш учун Enter Engineering, Eriell ва Saneg активларини сотишни режалаштираётгани маълум бўлган эди. Йирик лойиҳалар — МТО ГКМ, Бухоро аэропорти, Тебинбулоқ ва Фарғона НҚИЗ учун янги инвесторларни жалб қилиш кўзда тутилган.