Тошкент шаҳридаги Темур Малик ва Буюк ипак йўли кўчалари кесишмасидаги йўл ўтказгичнинг (собиқ Троицкий кўприги) таянч девори бир қисми ўпирилиб тушди.
Йўл ўтказгич Темур Малик кўчаси кенгайтирилиб, тўлиқ реконструкция қилинганидан сўнг 2024 йил август ойида очилган эди. Ўшанда объектни Ўзбекистон президенти бориб кўрганди. Расмий маълумотларга кўра, йўл ўтказгич илк бор йиғма темир конструкциялардан қурилган бўлиб, унинг хизмат қилиш муддати 100 йилдан ортиқ деб ҳисобланган.
Тошкент шаҳар ҳокимлиги жабрланганлар йўқлигини маълум қилди. Воқеа жойига авария хизматлари, техник мутахассислар ва масъул ташкилотлар вакиллари юборилган. Фавқулодда ҳолат юз берган ҳудуд ўраб олинган, Темур Малик кўчасининг бир қисми транспорт ҳаракати учун ёпилган.
Воқеа жойига Тошкент шаҳри ва Мирзо Улуғбек тумани ҳокимлари, шунингдек, соҳавий хизматлар раҳбарлари етиб келган.
Ҳозирда комплекс техник текширув ўтказилмоқда. Ҳодисанинг дастлабки омиллари сифатида «яқинда кузатилган кучли ёғингарчилик таъсири, жумладан, тупроқнинг ҳаддан ташқари намланиши ва конструкцияга тушадиган юкнинг ортиши» кўриб чиқилмоқда. Шу билан бирга, расмийлар «барча тегишли ҳолатларни, жумладан лойиҳа ечимлари, қурилиш-монтаж ишлари сифатини, дренаж тизимининг ҳолатини, қурилиш назорати ва объектни қабул қилиш тартибини» текшириш ниятида.
«Техник текширув натижаларига кўра қайта тиклаш ишлари бўйича қарорлар қабул қилинади, агар қоидабузарликлар ёки ишни лозим даражада бажармаслик ҳолатлари аниқланса, масъул шахсларни белгиланган тартибда жавобгарликка тортиш чоралари кўрилади», — дейилади ҳокимлик баёнотида.