АҚШ президенти Дональд Трамп Эрон билан тўлиқ таслим бўлиш ҳақидаги келишувдан бошқа ҳеч қандай битим тузилмаслигини маълум қилди.
«Эрон билан СЎЗСИЗ ТАСЛИМ БЎЛИШДАН бошқа ҳеч қандай келишув бўлмайди! Бундан кейин ва Эронда БУЮК ҳамда МАҚБУЛ раҳбар (ёки раҳбарлар) танланганидан сўнг, биз ва бизнинг ажойиб ҳамда жуда жасур иттифоқчиларимиз ва шерикларимиз Эронни вайронагарчилик ёқасидан қайтариш, уни иқтисодий жиҳатдан аввалгидан кўра яхшироқ, йирикроқ ва кучлироқ қилиш учун тинимсиз меҳнат қиламиз», — деб ёзди у ўзининг TruthSocial ижтимоий тармоғида.
У Эроннинг «буюк келажаги» бўлишини қўшимча қилди.
Бундан аввал Трамп Reuters агентлигига берган интервьюсида АҚШ Эроннинг янги раҳбариятини танлашда иштирок этиши кераклигини айтган эди.
«Биз Эронни келажакка бошлайдиган шахсни танлаш жараёнида иштирок этишни хоҳлаймиз, токи ҳар беш йилда бу масалага қайтиб, ҳаммасини қайтадан бошлашга мажбур бўлмайлик. Биз бу инсон халқ учун, мамлакат учун фойдали бўлишини истаймиз», — деди Оқ уй раҳбари.
Аввалроқ New York Times нашри Эроннинг янги олий раҳбари лавозимига асосий номзод сифатида ўлдирилган оятуллоҳ Али Хаменеийнинг 56 ёшли ўғли Можтаба Хаменеий кўрилаётгани ҳақида ёзган эди. Унинг сайланишини Ислом инқилоби қўриқчилари корпуси (ИИҚК) талаб қилмоқда, Можтаба Хаменеийнинг ушбу тузилма билан яқин алоқалари борлиги айтилади.
Трамп ушбу маълумотга изоҳ берар экан, Reuters агентлигига Можтаба Хаменеийнинг Эроннинг янги раҳбари бўлиши эҳтимоли пастлигини айтди.
2026 йил 28 февраль куни АҚШ ва Исроил Эронга қарши ҳарбий амалиёт бошлади. Ҳаво ҳужуми натижасида Эрон олий раҳбари Али Хаменеий ҳалок бўлди. Эрон бунга жавобан Форс кўрфази мамлакатларидаги АҚШ ҳарбий базаларига ҳужум қилди.