Самарқанд вилоятининг Иштихон туманида оилавий корхона биносининг ертўласида ноқонуний электр энергиясидан фойдаланган майнинг-ферма аниқланди. Ўзэнергоинспекция матбуот хизмати хабарига кўра, ферма 28.896 миллиард сўмлик (Марказий банкнинг амалдаги курси бўйича 2.255 миллион АҚШ доллари) электр энергиясини ноқонуний тарзда ишлатган.
Бу ҳолат вилоят энергетика инспекцияси, ИИВ Оператив-қидирув департаментининг киберхавфсизлик маркази, ҳудудий ИИБ, ДХХ ва прокуратура томонидан ўтказилган тезкор тадбирда фош этилди.
Майнинг-ферма оилавий корхона “М. Г. М.” биносига туташ ертўлада жойлашган эди. Майнинг учун мўлжалланган 89 та қурилманинг умумий қуввати 244.4 кВтни ташкил этган. Улар электр тармоғига ҳисоблагични четлаб ўтган ҳолда уланган эди.
Таъкидланишича, майнинг-ферма оилавий корхона ҳудудида яширинча ишлаб турган бўлиб, катта миқдорда электр энергиясини ноқонуний тарзда сарф қилган. Тезкор тадбир жараёнида ноқонуний фаолиятга чек қўйилди ва ҳодиса бўйича тегишли чоралар кўрилмоқда.
