Ўзбекистон ҳукумати 2026 йил 28 февралдаги қарори билан Тошкент шаҳрининг 2045 йилгача бўлган даврга мўлжалланган бош режаси асосий кўрсаткичларига ўзгартиришлар киритди. Мазкур бош режа 2024 йил 24 декабрда тасдиқланган эди.
Ҳужжатга янги турар жой массивлари, меҳмонхоналар, бизнес-марказлар, ижтимоий объектлар ва саноат зонасини қуриш бўйича инвестиция лойиҳалари параметрлари киритилди. Бош режага тузатиш киритиш бўйича таклифлар Урбанизация ва уй-жой бозорини барқарор ривожлантириш миллий қўмитаси, Қурилиш ва уй-жой коммунал хўжалиги вазирлиги ҳамда пойтахт ҳокимлиги томонидан киритилган.
Инвестиция лойиҳалари
Қарорга мувофиқ, хорижий ва маҳаллий инвесторлар томонидан умумий қиймати 16,2 млрд доллардан ортиқ бўлган 31 та инвестиция лойиҳаси концепцияси ишлаб чиқилган.
Уларни умумий майдони 2311,4 гектар бўлган ер участкаларида амалга ошириш режалаштирилган. Қурилиш ҳисобига ҳар йили қўшимча равишда қуйидагилар таъминланиши кутилмоқда:
- 1,5 млрд долларлик ялпи ҳудудий маҳсулот;
- 3,5 трлн сўмлик соф солиқ тушумлари;
- 260 мингта янги иш ўрни яратилиши.
Ташаббусларнинг катта қисми кўп квартирали турар жой мажмуалари қурилиши билан боғлиқ. Уларнинг таркибига қуйидагилар киради:
- кўп қаватли уйлар (жумладан, 9 ва 16 қаватли);
- биринчи қаватларида тижорат бинолари бўлган турар жой мажмуалари;
- маиший хизмат кўрсатиш объектлари;
- ижтимоий-дам олиш инфратузилмаси.
Лойиҳалар Бектемир, Миробод, Сергели, Чилонзор, Яшнобод, Мирзо Улуғбек, Шайхонтоҳур, Юнусобод, Учтепа ва Янгиҳаёт туманларида амалга оширилиши белгиланган.
Шаҳар марказида ва айрим ҳудудларда бир нечта беш юлдузли меҳмонхоналар қурилиши кўзда тутилган. Алоҳида ажралиб турадиган Tonino Lamborghini Residences лойиҳаси премиум-классдаги апартаментлар, беш юлдузли меҳмонхона ва бизнес-марказни ўз ичига олади.
Рўйхатдан, шунингдек, замонавий бизнес-марказлар, савдо марказлари, кўп функцияли савдо-сервис мажмуалари ҳам ўрин олган. Лойиҳалар орасида талабалар турар жойи, клиника ва соғломлаштириш маркази, маиший хизмат кўрсатиш ва жамоат инфратузилмаси объектлари ҳам бор.
Янгиҳаёт туманидаги «Янги авлод» саноат зонасида ишлаб чиқариш ва сервис объектларини ташкил этиш режалаштирилган. Лойиҳа йирик индустриал майдонни шакллантиришни назарда тутади.
Камида 30 фоизи — яшил зоналар учун
Реновация ва реконструкция лойиҳаларини амалга оширишда комплекс қурилиш тамойили мустаҳкамланди. Хусусан:
- ҳар бир лойиҳа ҳудудининг камида 30 фоизи яшил зоналар учун ажратилиши керак;
- эскирган бинолари бўлган маҳаллаларни комплекс янгилаш кўзда тутилган;
- майдони 1 гектаргача бўлган участкаларда майда ва зич қурилишлардан воз кечиш режалаштирилмоқда.
Бундан ташқари, қурувчилар томонидан тўланадиган инфратузилма тўловлари ва бошқа ажратмалар ҳисобига қўшимча жамоат боғлари ташкил этилиши лозим. Пойтахт ҳокимлиги ҳузуридаги «Tashkent Invest» компанияси биринчи навбатда тўққизта жойда умумий майдони 139,6 гектар бўлган янги яшил ҳудудларни барпо этади. Улар ташкил этилгандан сўнг консервация зонасига ўтказилади.
Мастер-планлар ва оширилган коэффициентлар
Ҳар бир лойиҳа учун икки ой муддатда меъморий, муҳандислик ва ижтимоий-иқтисодий параметрларни ҳисобга олган ҳолда мастер-планлар ишлаб чиқилади. Улар Тошкент шаҳар қурилиш бош бошқармаси ҳузуридаги Ҳудудий архитектура-шаҳарсозлик кенгашида кўриб чиқилади ва шаҳар ҳокимлиги томонидан тасдиқланади.
Инвесторлардан муҳандислик тармоқлари ва транспорт инфратузилмасини яратиш харажатларини қисман қоплаш учун инфратузилма тўловлари ундирилади.
Бунда инфратузилма тўловининг базавий ставкасига қурилиш зичлиги, яшил ҳудудлар улуши ва ижтимоий инфратузилмага тушадиган юкламадан келиб чиқиб, 1,1 дан 3,0 гача бўлган оширувчи коэффициентлар қўлланилиши мумкин. Қарор архитектура-шаҳарсозлик кенгаши тавсиялари асосида халқ депутатлари Тошкент шаҳар Кенгаши томонидан қабул қилинади.
Қарор билан лойиҳалаш ва қуришда халқаро ҳамда хорижий меъёрий-техник ҳужжатлардан миллий шаҳарсозлик нормаларига мажбурий мослаштириш ва экспертизадан ўтказиш шарти билан фойдаланишга рухсат берилди. Бино ва корхоналарни лойиҳалашда табиий газга муқобил ёқилғи турлари ва энергия тежовчи технологиялардан фойдаланиш кўзда тутилиши лозим.
Эслатиб ўтамиз, 9 та жамоат боғини ташкил этиш лойиҳалари 2026 йил 25 февраль куни Президентга тақдим этилган эди. Ушбу 139,6 гектарлик боғлардан ташқари, янги қурилиш лойиҳаларидаги яшил зоналар (улар ҳудудининг камида 30 фоизи) яна қарийб 400 гектарни ташкил этиши хабар қилинган.