Ички ишлар вазирининг биринчи ўринбосари, Жамоат хавфсизлиги департаменти (ЖХД) бошлиғи, генерал-майор Рустам Жўраев Тошкент шаҳар ИИББда йўл ҳаракати хавфсизлиги масалаларига бағишланган йиғилиш ўтказди. Бу ҳақда ЖХД таркибига кирувчи ЙҲХХ матбуот хизмати хабар берди.
Йиғилиш Тошкент марказида мактаб ўқувчиси бошқарувидаги BMW M4 автомобили ЙПХ инспектори Ҳосилбек Эшназаровни уриб юборганидан олти кун ўтиб ташкил этилди. Инспектор қўпол қоидабузарликлар билан ҳаракатланаётган (кейинчалик маълум бўлишича, бу биринчи марта эмас) ҳайдовчини тўхтатиш чораларини кўришга уринган эди. Орадан икки кун ўтиб, инспектор ҳушига келмай вафот этди.
Ҳодисадан кўп ўтмай, Uzbelas Performance тюнинг-ательеси раҳбари Асадбек Жумаев ҳибсга олинди. У машиналарга махсус сигналлар ўрнатганини ва ЙҲҚ бузилиши акс этган видеоларни эълон қилиб келганини тан олган. Иккала ҳолат ҳам сўнгги йилларда оммавий тус олган Йўл ҳаракати қоидаларига очиқчасига ва кўз-кўз қилиб беписандлик билан қараш муаммосини юзага чиқарди.
2026 йил 26 февралдан бошлаб Ўзбекистонда кўчалардаги тунги рейдлар, интернет тармоғида йўл безорилиги акс этган материаллар мониторинги ҳамда автосервис шохобчаларини текшириш ишлари кучайтирилди.
Йиғилишда ЖХД раҳбари авариялар сонини камайтириш, оғир оқибатли ЙТҲларнинг олдини олиш, стационар ва мобил постлар иши самарадорлигини ошириш бўйича вазифаларни белгилаб берди.
Ижтимоий тармоқлар ва мессенжерларда хавфли ҳайдаш ҳамда ноқонуний кўча пойгаларини тарғиб қилувчи видеоматериалларни жойлаштирган шахсларни жавобгарликка тортиш масаласи алоҳида таъкидланди. ЙҲҚнинг қўпол бузилишини оммалаштирувчи аккаунтларни блоклаш режалаштирилмоқда.
ЙҲХХ маълумотларига кўра, 26 февралдан 3 мартгача бўлган даврда интернет платформалари мониторинги давомида йўл безорилиги фактлари акс этган 107 та видеоматериал аниқланган. 66 нафар ҳайдовчига нисбатан маъмурий баённомалар расмийлаштирилди. 62 та транспорт воситаси жарима майдончаларига жойлаштирилди.
Ушбу кунлар давомида Республика бўйича жами 5919 та қўпол ЙҲҚ бузилиши аниқланиб, барча автомобиллар жарима майдончаларига қўйилди. Қоидабузарликларнинг асосий турлари қуйидагича бўлди:
- ноқонуний тонировка — 116 ҳолат,
- ЙПХ ходимларининг талабларига бўйсунмаслик — 70,
- сирена ва милтиқловчи чироқларни ноқонуний ўрнатиш — 61,
- давлат рақамисиз бошқариш — 34,
- пойгаларда қатнашиш — 4 та.
Ҳуқуқбузарларнинг 54 нафари вояга етмаганлар экани маълум бўлди.
Бундан ташқари, ЙҲХХ ходимлари патруль-пост хизмати ходимлари билан ҳамкорликда 262 та ўткир тиғли буюмларни олиб юриш ва 23 та гиёҳвандлик ҳамда психотроп моддаларни ноқонуний сақлаш фактларини аниқладилар.
Шунингдек, ЙҲХХ ходимлари тюнинг хизматларини кўрсатувчи компанияларнинг 68 нафар раҳбари ва 79 нафар ходими билан суҳбат ўтказди. 100 нафар автосервис раҳбари билан профилактик тушунтириш ишлари олиб борилди.