Ўзбекистон ташқи ишлар вазири Бахтиёр Саидов Эрон ташқи ишлар вазири Сейед Аббос Арагчи билан телефон орқали мулоқот қилди, деб хабар берди ТИВ матбуот хизмати.
Эронлик ҳамкасби билан суҳбатда Бахтиёр Саидов тинч аҳоли ҳалок бўлгани муносабати билан ҳамдардлик билдирди ва сўнгги воқеалар оқибатида жабр кўрган оилаларга таъзия сўзларини етказди.
Ташқи сиёсат идоралари раҳбарлари, шунингдек, минтақадаги вазиятнинг ривожланиши бўйича фикр алмашдилар. Эскалациянинг янада кучайиши жиддий гуманитар оқибатларга олиб келиши ва хавфсизлик учун қўшимча хавфлар туғдириши мумкинлиги қайд этилди.
Ўзбекистон томони «барча келишмовчилик ва низолар фақат тинч йўл билан — мулоқот ва дипломатия орқали ҳал этилиши лозимлиги ҳақидаги изчил ва принципиал позициясини» яна бир бор тасдиқлади.
Эслатиб ўтамиз, аввалроқ Ўзбекистон ТИВ раҳбари Бахтиёр Саидов Яқин Шарқ мамлакатларидаги ҳамкасблари — Қатар, Қувайт, Уммон, Иордания, Баҳрайн ва БАА ташқи ишлар вазирлари билан телефон орқали мулоқот қилган эди. У улар билан минтақадаги вазиятни муҳокама қилган ва Президент Шавкат Мирзиёевнинг қўллаб-қувватлаш ҳамда бирдамлик сўзларини етказган эди.