2026 йил январь-февраль ойларида Ўзбекистонда гиёҳвандлик воситаларини сотиш ва тарқатиш билан шуғулланувчи 22 та уюшган наркогуруҳ фаолиятига чек қўйилди, деб хабар берди Ички ишлар вазирлиги.
Тезкор тадбирлар давомида 5 нафар етакчи ва 84 нафар кўмакчи қўлга олинди, шунингдек, 8 та яширин лаборатория тугатилди. Бу 2025 йил давомида аниқланган ва йўқ қилинган жами наркотиклаб ишлаб чиқариш жойларининг ярмидан кўпини ташкил этади (ўтган йили уларнинг сони 14 та эди).
Улар орасида психотроп моддалар тайёрланадиган 3 та яширин цех бўлган бўлса, яна 5 таси синтетик наркотиклар ишлаб чиқариш учун ташкил этилган.
Қўлга олинганларнинг 20 нафари психотроп препаратларни тарқатиш билан, 28 нафари анъанавий гиёҳвандлик воситалари билан, 41 нафари эса интернет-наркодўконлар орқали синтетик наркотиклар сотиш билан шуғулланган.
Ўтказилган тезкор тадбирлар натижасида ноқонуний муомаладан 41 кг анъанавий гиёҳвандлик воситалари, 100 кг дан ортиқ синтетик наркотиклар, 1 миллион бир марталик дозага тенг бўлган қарийб 200 минг дона психотроп препаратлар, шунингдек, қарийб 2 тонна прекурсорлар мусодара қилинди.
ИИВ маълумотларига кўра, ушбу уюшган наркогуруҳлар ўртача 3 ойдан 10 йилгача жиноий фаолият билан шуғулланиб келган. Улар ҳар йили ўртача 1 миллион донадан ортиқ психотроп дориларни, шунингдек, 2 тоннадан 2,5 тоннагача бўлган гашиш ва афюн каби гиёҳвандлик воситаларини пуллаган.
Интернет-наркодўконлар орқали бир йилда ўртача 350 кг га яқин, 3 йил ичида эса 700 кг дан 800 кг гача синтетика тарқатилган, бу «закладка» (яшириб кетиш) усулида сотилган қарийб 4 миллион бир марталик дозага тўғри келади.
Тошкент, Наманган, Андижон, Самарқанд ва Сирдарё вилоятларининг 40 та туман ва шаҳарлари сотув ҳудудлари этиб белгиланган. ИИВ хабарига кўра, контрабанда Ўзбекистонга Афғонистондан Сурхондарё орқали, Қирғизистондан Наманган ва Андижон вилоятлари орқали ҳамда Қозоғистондан Тошкент вилояти орқали олиб кирилган.