2026 йил 28 февраль куни эрталаб Тошкентга Санкт-Петербургда деразадан тушиб кетган болани қутқариб қолганидан сўнг Ўзбекистон ва Россияда машҳур бўлган Ҳайрулло Ибодуллаев учиб келди.
Уни кутиб олиш учун нафақат қариндошлари, балки журналистлар ва жамоатчилик вакиллари ҳам келишди. Қаҳрамонлик кўрсатган эркакка миннатдорчилик ва ҳурмат сўзлари изҳор этилди.
Ҳайрулло Ибодуллаев келган Centrum Air авиакомпанияси унга ташувчининг йўналишлар тармоғи бўйича барча йўналишларга 5 йил давомида бепул учиш учун сертификат (йилига иккита чипта) топширди.
Бундан ташқари, Centrum Holidays туроператори унинг ота-онасига Умра зиёратини амалга ошириш учун Саудия Арабистонига йўлланма совға қилди, деб хабар берди авиакомпания матбуот хизмати.
Болани қутқариш вақтида қўлидан жароҳат олган Ҳайрулло Ибодуллаев соғлиғини тиклаш ва оиласи билан вақт ўтказиб, дам олишни режалаштираётганини айтди. У, шунингдек, Ўзбекистонда ишлаш имкониятини кўриб чиқишини қўшимча қилди.
Эслатиб ўтамиз, фаррош бўлиб ишлаган 36 ёшли ўзбекистонлик еттинчи қаватдаги деразадан тушиб кетган 7 ёшли болани тутиб қолган эди.
Ўзбекистон президенти Шавкат Мирзиёев уни “Жасорат” медали билан тақдирлади. Давлат органлари вакиллари унинг Қашқадарё вилоятидаги хонадонига ташриф буюриб, совғалар топширишди.
Санкт-Петербург губернатори унга Қутқаришдаги мардлиги учун кўкрак нишонини топширди. Россия сегодня ва RT раҳбари Маргарита Симоньян ўзбекистонликни 1 млн рубль миқдоридаги Тигран Кеосаян номидаги мукофот билан тақдирлади.