Жиззах вилоятида Telegram орқали вояга етмаганлар иштирокидаги порнографик материалларни тарқатган эркак қўлга олинди, деб хабар берди Ўзбекистон Ички ишлар вазирлиги Киберхавфсизлик маркази матбуот хизмати.
Тергов маълумотларига кўра, у ўзига тегишли бўлган ва 442 нафар аъзоси бор Telegram-каналида болалар иштирокидаги 403 та порнографик материални эълон қилган.
Бошқа бир ҳолатда Тошкент вилоятида яшовчи 22 ёшли йигит қўлга олинган. У Telegram’да қизлар номидан 6 та канал очиб, уларга жами 3750 та порнографик материал жойлаштирган.
Тергов талқинига кўра, у ижтимоий тармоқлар орқали вояга етмаганлар иштирокидаги порнографик маҳсулотларни 837 нафар шахсга сотиб, 29,2 млн сўм миқдорида даромад кўрган.
Жиноят кодексининг 130-моддаси 3-қисми (вояга етмаган шахснинг порнографик тавсифдаги тасвирини тарқатиш ёки вояга етмаган шахсни порнографик хусусиятга эга ҳаракатлар ижрочиси сифатида жалб этиш) билан жиноят иши қўзғатилган. Ушбу модда бўйича 5 йилдан 7 йилгача озодликдан маҳрум қилиш жазоси назарда тутилган. Гумонланувчилар қамоққа олинган.