БМТ Бош Ассамблеяси Россиянинг Украинага кенг кўламли босқинининг тўрт йиллигида «Украинада барқарор тинчликни қўллаб-қувватлаш» деб номланган резолюцияни қабул қилди. Бу ҳақда ташкилот матбуот хизмати хабар берди.
Украинанинг «халқаро миқёсда тан олинган чегаралари доирасидаги суверенитети, мустақиллиги, бирлиги ва ҳудудий яхлитлиги» ҳуқуқини тасдиқловчи ҳужжат учун 2026 йил 24 февраль куни Нью-Йоркда 107 давлат вакили овоз берди.
12 та давлат — Россия, Беларусь, Буркина-Фасо, Бурунди, Куба, Шимолий Корея, Эритрея, Эрон, Мали, Нигер, Никарагуа ва Судан қарши чиқди. Яна 51 давлат, жумладан, Ўзбекистон, Қозоғистон, Қирғизистон, Тожикистон, шунингдек, АҚШ, Хитой, Ҳиндистон, ЖАР, Арманистон, Бразилия ва БАА бетараф қолди.
Резолюция ўт очишни зудлик билан тўхтатишга, ҳарбий асирларни тўлиқ алмашишга, Россия томонидан ноқонуний ушлаб турилган барча шахсларни озод қилишга ва тинч аҳолини Украинага қайтаришга чақиради.
Украина Ташқи ишлар вазири Андрей Сибига ҳужжат қабул қилинишини олқишлади. «Ҳал қилувчи лаҳзаларда халқаро ҳамжамият ўз позициясини аниқ баён этиши керак. Бугун шундай бўлди», — деб ёзди у Х ижтимоий тармоғида. Унинг сўзларига кўра, Украина учун бу «шунчаки навбатдаги овоз бериш эмас», балки мамлакат ёлғиз эмаслиги ва БМТ Низоми тамойиллари ўз аҳамиятини сақлаб қолаётганининг тасдиғи.
Қўшма Штатлар резолюциянинг бир қатор бандлари бўйича алоҳида овоз беришни талаб қилди. Хусусан, Вашингтон Украинанинг ҳудудий яхлитлиги ҳақидаги ифода ва халқаро ҳуқуққа мувофиқ «умумий, адолатли ва барқарор» тинчликка чақирувчи банд бўйича алоҳида овоз беришни таклиф қилди.
АҚШнинг БМТдаги вакили ўринбосари Тэмми Брюс Вашингтон ўт очишни зудлик билан тўхтатиш чақириғини қўллаб-қувватлашини билдирди. Бироқ, унинг сўзларига кўра, ҳужжатда «барқарор тинчликка йўл очиш учун барча дипломатик каналларни қўллаб-қувватлаш ўрнига, жорий музокаралардан чалғитиши мумкин бўлган» қоидалар мавжуд. АҚШнинг алоҳида овоз бериш ҳақидаги таклифи қўллаб-қувватланмади, шундан сўнг Америка томони бетараф қолди.
«Урушга чек қўйиш учун ҳозир сиёсий ирода керак. Биз келишувга ушбу низо бошланганидан бери ҳар қачонгидан ҳам яқинроқ эканимизга ишонамиз. Майли, ушбу йиллик жуда узоқ давом этаётган ва жуда қимматга тушаётган урушнинг охирги йиллиги бўлсин. Келинг, унга ҳозироқ чек қўяйлик», — деди Брюс.
Россия Федерациясининг доимий вакили Василий Небензянинг таъкидлашича, Ғарб давлатлари, биринчи навбатда Европа давлатлари, низони дипломатик йўл билан ҳал қилишга тўсқинлик қилмоқда ва уни давом эттиришга урғу бермоқда. Россия томонининг фикрича, инқироз чуқур тарихий ва сиёсий сабабларга эга, дипломатия эса уни ҳал қилишнинг асосий воситаси бўлиб қолиши керак.
Кенг кўламли уруш бошланганидан тўрт йил ўтиб, келгуси ўн йил ичида Украинани қайта тиклаш учун қарийб 588 млрд доллар (500 млрд евродан ортиқ) маблағ талаб этилади. Бу ҳақда Украина ҳукумати, Жаҳон банки, Европа комиссияси ва Бирлашган Миллатлар Ташкилоти томонидан тайёрланган зарар ва эҳтиёжларни баҳолаш бўйича янгиланган қўшма ҳисоботда айтилади. Ушбу сумма мамлакатнинг 2025 йил учун прогноз қилинаётган номинал ЯИМ ҳажмидан деярли уч баравар кўп.