АҚШ Молия вазирлигининг Хорижий активларни назорат қилиш бошқармаси (OFAC) Ўзбекистон фуқароси Азизжон Маҳмудович Мамашоев ва Advance Security Solutions компаниясини санкциялар рўйхатига киритди.
Рўйхатда унинг паспорт ва идентификация маълумотлари ҳам келтирилган. 1987 йилда туғилган Мамашоевнинг Сергей Зеленюк билан алоқадорлиги қайд этилган.
Шу билан бирга, 2025 йилда рўйхатга олинган ва дастурлаш соҳасида фаолият юритувчи Advance Security Solutions (шунингдек, Advanced Security Solutions) компаниясига нисбатан ҳам санкциялар жорий этилди. Манзил сифатида Дубай (БАА) ва Тошкент кўрсатилган. OFAC маълумотларига кўра, компания Мамашоев томонидан ташкил этилган ва ҳужумкор киберхавфсизлик (Offensive Security) соҳасида фаолият юритади.
Идоранинг таъкидлашича, Advance Security Solutions эксплойтлар (бузиб кириш воситалари) брокери ҳисобланади ва Operation Zero каби АҚШда ишлаб чиқилган дастурий таъминотлардаги заифликлар учун мукофотлар таклиф этади. Компания АҚШ президентининг фармони асосида Мамашоевга тегишли ёки у томонидан назорат қилинадиган ёхуд унинг номидан ҳаракат қилган тузилма сифатида рўйхатга киритилган.
Бундан ташқари, OFAC томонидан Trickbot кибержиноятчилик гуруҳининг тахминий иштирокчиси деб аталган Россия фуқароси Олег Вячеславович Кучеров ҳам санкцияга тушди. Илк бор 2016 йилда аниқланган ушбу гуруҳ АҚШ давлат органлари, шунингдек, шифохона ва тиббиёт муассасаларига қарши киберҳужумлар, жумладан, товон талаб қилувчи дастурлар ёрдамида ҳужумлар уюштириш учун модулли зарарли дастурий таъминотдан фойдаланган.
OFAC маълумотига кўра, Мамашоев ва Кучеров аввалроқ Operation Zero билан ишчи алоқаларга эга бўлган. Улар Сергей Зеленюкка сезиларли молиявий, моддий ёки технологик ёрдам кўрсатгани ёхуд унинг манфаатларини кўзлаб ҳаракат қилгани учун санкциялар рўйхатига киритилган.
SDN List рўйхатига киритилиш АҚШ юрисдикциясидаги активларни блоклашни ва Америка шахсларига улар билан ҳар қандай операцияларни амалга оширишни тақиқлашни назарда тутади.