Украина президенти Владимир Зеленский Россия билан кенг кўламли уруш бошланганининг тўрт йиллиги муносабати билан халққа мурожаат қилди.
«Бугун Путин Киевни уч кунда олишига роппа-роса тўрт йил тўлди. Бу бизнинг қаршилигимиз, Украина шу вақт давомида қандай курашаётгани ҳақида кўп нарсани англатади. Бу сўзлар ортида миллионлаб одамларимиз, улкан жасорат, жуда оғир меҳнат, чидам ва Украина 24 февралдан бери босиб ўтаётган катта йўл турибди», — деди у ўз мурожаатида.
Зеленский мурожаатни Банковаядаги президент офиси остида жойлашган бункердан ёзиб олди. Унинг сўзларига кўра, босқин бошида у айнан шу ердаги кабинетида илк музокараларни олиб борган. «Мен шу ерда президент [АҚШ президенти Жо] Байден билан гаплашганман ва айнан шу ерда: „Владимир, хавф бор, сиз зудлик билан Украинани тарк этишингиз керак. Биз бунга ёрдам беришга тайёрмиз“, деган гапларни эшитганман. Мен эса менга такси эмас, қурол кераклигини айтганман», — деди.
Унинг сўзларига кўра, ҳукумат ва ҳарбийлар Украина оёқда қолиши учун бункерда ечимлар излашган, чунки қурол-яроғ, дори-дармон ва озиқ-овқат етказиб бериш керак эди. «Тўғрисини айтсам, турли ҳолатлар бўлди, бу ерда ҳам расмий тил, ҳам ноадабий тил ишлатилди, чунки ҳар бир ёрдам пакети, Россияга қарши ҳар бир санкция, ҳар бир қурол партияси — буларнинг ҳаммасини ҳақиқатда… ҳақиқатда юлиб олиш керак эди. Украинага бўлган ишончни юлиб олиш. Дунёни ҳаракатга келтириш керак эди», — деб қайд этди Зеленский.
«Биз мустақилликни ҳимоя қилдик, давлатчиликни бой бермадик, Путин ўз мақсадларига эришмади, деб айтишга тўла ҳақлимиз. У украиналикларни синдира олмади, бу урушда ғалаба қозонмади. Биз Украинани сақлаб қолдик ва тинчлик ҳамда адолатга эришиш учун ҳамма нарсани қиламиз», — дея қўшимча қилди.
«Ҳаммамиз уруш тугашини хоҳлаймиз. Лекин ҳеч ким Украинанинг тугашига йўл қўймайди. Биз тинчликни хоҳлаймиз. Кучли, муносиб ва давомли тинчликни. Ҳар бир музокара раунди олдидан мен жамоамизга жуда аниқ кўрсатмалар бераман: шу йиллар ичида қилинган ишларни йўққа чиқармаслик, бутун кураш, жасорат ва қадр-қимматни қадрсизлантирмаслик. Буни бериб юбориш, унутиш ва хоинлик қилиш мумкин эмас. Айнан шунинг учун ҳам келишув кучли бўлиши учун ҳар бир сўз, ҳар бир банд, хавфсизликнинг реал кафолатлари учун шунча музокара раундлари ва жанглар бўлмоқда», — деди Украина президенти.
Шунингдек, у АҚШ президенти Дональд Трампни Киевга таклиф қилди. «Мен аниқ биламан: фақат Украинада бўлиб, ҳаётимиз ва курашимизни ўз кўзи билан кўрганда, одамларимизни ва мана шу чексиз оғриқни ҳис қилгандагина, бу уруш аслида нима ҳақида эканини тушуниш мумкин», — деди Зеленский.
2026 йил 24 февраль куни Украина пойтахтига Европа етакчилари, жумладан, Европа комиссияси президенти Урсула фон дер Ляйен, Финляндия президенти Александр Стубб ва Дания бош вазири Метте Фредериксен ташриф буюрди. Улар «Истак билдирганлар коалицияси» йиғилишида ҳамда «Украина — Шимолий Европа ва Болтиқбўйи мамлакатлари» саммитида иштирок этадилар.
Бундан аввал Украина президенти офиси раҳбари Кирилл Буданов шу ҳафта охиригача Женевада Россия томони билан музокараларнинг навбатдаги раунди ўтказилишини эълон қилган эди. Охирги марта Украина, Россия ва АҚШ делегацияларининг учрашуви 17-18 февраль кунлари Женевада бўлиб ўтган эди. Уч томонлама музокараларнинг биринчи раунди 23-24 январь кунлари Абу-Дабида, иккинчиси эса 4-5 февраль кунлари айнан ўша ерда ўтказилган эди. Ҳозирча музокаралар тинч йўл билан ҳал этиш борасида силжиш келтирмади.
Москва Киевдан Россия ҳали эгаллаб олмаган Донецк вилояти ҳудудларидан қўшинларини олиб чиқишни талаб қилмоқда. Украина ўз ерларини беришдан бош тортмоқда.
2026 йил 23 февраль куни Financial Times газетасида эълон қилинган интервьюсида Зеленский Украина армиясининг Донбасдан чиқиб кетиши урушни тўхтатишига шубҳа билдирди. «АҚШ агар Украина Донбасснинг шарқий қисмини берса, Путин урушни тўхтатишига ишонмоқда. Тўғрисини айтсам, мен бу Россия талаб қилаётган ҳамма нарса эканига ишонмайман… Россияга ишониб бўлмайди», — деди Украина етакчиси.
У Трамп томонидан Украинага кўрсатилаётган босим Россияга кўрсатилаётган босимдан анча кучли эканини таъкидлади. «Умид қиламанки, Трамп ва АҚШ Россияга босим ўтказади ва Путинни тўхтатади. Аммо мен Украина фуқароларига, армиямизга ва ишлаб чиқаришимизга таянаман», — дея қўшимча қилди Зеленский.