36 ёшли ўзбекистонлик Хайрулло Ибадуллаев Санкт-Петербург куйидаги турар жой биносининг 7-қаватидаги деразадан тушиб кетган 7 ёшли болани қутқариб қолди, деб хабар бермоқда 78.ru.
Хабар қилинишича, бола очиқ дераза олдида ўйнаб туриб, сирғалиб кетган ва дераза токчасига осилиб қолган. Болани фаррош пайқаб қолган — бола ҳали квартира ичида бўлган вақтдаёқ эркак унга деразадан узоқроқ кетишни айтиб бақирган. Боланинг кучи тугаб, қўллари бўшашганида, эркак уни тутиб қолган.
Бола тушиб кетганидан сўнг дарҳол эркак унга биринчи ёрдам кўрсатган ва консьерж ёнига олиб борган. Кейинроқ квартирадан боланинг онаси тушиб келган.
«Кейин тез ёрдам уни олиб кетди. Ҳозир ҳаммаси жойида. Мен ҳам қўрқиб кетдим. Энг муҳими — бола омон қолди. Мен хавотирдаман», — деди эркак.
Бола тирик қолган, у оёқ синиши ва ички аъзолар жароҳати билан касалхонага ётқизилган. Ҳозир у жонлантириш бўлимида, аҳволи барқарор. Бола аутизм билан касаллангани маълум.
Хайрулло Ибадуллаевнинг қўли ва қовурғалари синган, у ҳам шифохонага ётқизилган.
У Россияга тўрт ой олдин ишлаш учун келган. Ўзбекистонда унинг тўрт нафар фарзанди ва ота-онаси бор. У оиласини боқиш учун қаттиқ меҳнат қилаётганини ва автомобиль сотиб олишни орзу қилишини айтган.
2024 йил апрель ойида ўзбекистонлик фаррош Олимжон Ибрагимов Санкт-Петербург куйидаги ёнғин вақтида қувур орқали учинчи қаватга чиқиб, бир неча кишини қутқариб қолган эди. У десант қўшинларида хизмат қилганини айтган. «Ёрдам бериш бизнинг бурчимиз, Худо ҳаммани кўриб турибди», — деган эди ўшанда.