АҚШ Совринли Штатларга ноқонуний миграцияни, жумладан болалар миграциясини билиб туриб қўллаб-қувватлаган Ўзбекистоннинг икки компанияси раҳбарлари ва мутасадди шахсларига нисбатан виза чекловларини жорий этди. Бу ҳақда АҚШ Давлат департаменти матбуот котибининг бош ўринбосари Томас Пиготт маълум қилди.
Ушбу қарор АҚШ иммиграция қонунчилиги доирасида қабул қилинган бўлиб, унда АҚШда бўлиши ёки тахмин қилинаётган фаолияти мамлакат ташқи сиёсати учун жиддий салбий оқибатларга олиб келиши мумкин бўлган шахсларнинг киришини тақиқлаш кўзда тутилган, деди.
Тергов давомида аниқланишича, мазкур шахслар АҚШга ноқонуний миграция қилмоқчи бўлган чет элликларни, шу жумладан болаларни, аэропортлар ва қуруқликдаги чегаралар орқали Марказий Америкадаги транзит пунктларига етказишни «фаол мувофиқлаштирган», у ердан эса кўпчилик кейинчалик Қўшма Штатларга ноқонуний киришга уринган.
«Қўшма Штатлар миллий хавфсизлигимизни ёки иммиграция қонунчилигимизни бузишга қаратилган ҳеч қандай уринишларга тоқат қилмайди. Давлат департаменти ноқонуний миграциядан фойда кўраётганлар жазоланишини таъминлайди ва биз чегараларимизни ҳамда миллий хавфсизлигимизни ҳимоя қилиш учун контрабанда тармоқларига қарши фаол курашамиз», — дейилади баёнотда.
Давлат департаменти вакили Қўшма Штатларга ноқонуний миграцияга кўмаклашувчи жиноий тармоқларни йўқ қилишдаги яқин ҳамкорлиги учун АҚШнинг Ўзбекистон ҳукуматидан «чуқур миннатдор эканини» тасдиқлади.
Аввалроқ, президент Дональд Трамп ҳокимиятга келганидан бери бир йил ичида АҚШдан у ерда ноқонуний бўлиб турган ўзбекистонликларни депортация қилиш бўйича 11 та рейс ташкил этилгани хабар қилинган эди. Жами 700 га яқин киши қайтарилган.
2024 йил охирида АҚШ элчихонаси Ўзбекистон фуқароларини Қўшма Штатларга бориш учун «хавфсиз ва қонуний» йўлдан фойдаланишга чақириб, ноқонуний кирганлар «тезда чиқариб юборилишини» билдирган эди. Дипмиссия, шунингдек, АҚШ Штатларда қолиш учун қонуний асослари бўлмаган фуқароларни чиқариб юбориш борасида Ўзбекистон ҳукумати билан «яқин ҳамкорлик қилаётганини» қайд этган.