Жиноят ишлари бўйича Тошкент шаҳар Чилонзор туман суди банк ходимасига нисбатан жинсий шилқимлик қилиш билан боғлиқ иш кўриб чиқилди.
Иш материалларига кўра, 25 ёшли У. О. Наманган вилояти Чортоқ туманидаги банклардан бирида жабрланувчи М. И. билан бирга ишлаган. 2025 йил декабрь ойида улар мусобақаларда қатнашиш учун Тошкентга юборилган.
Суд қарорида қайд этилишича, 19 декабрга ўтар кечаси «Роҳат» меҳмонхонасида эркак бирга кечки овқат қилиш баҳонасида ҳамкасбининг хонасига кирган.
Судда эркак айбига иқрор бўлди. У жабрланувчи билан 2021 йилдан бери таниш эканини, унинг олдига овқатланиш ва мусобақага тайёргарлик кўриш учун кирганини, ҳамкасбини қучоқламоқчи бўлганида у қаршилик кўрсатганини тушунтирди. У суддан енгилроқ жазо тайинлашни сўради.
Жабрланувчининг сўзларига кўра, у бирга овқатланишдан бош тортганига қарамай, ҳамкасби хонада қолган. Бир қанча вақт ўтгач, у шилқимлик қилишни бошлаб, яқинлик қилишни таклиф этган.
Аёл: «Буни қилгандан кўра ўлганим афзал», деганида, эркак: «Унда ўласан», деб жавоб берган ва уни каравотга йиқитиб, ёстиқ билан бўға бошлаган. Аёл бақириб, хонадан чиқиб кетишга ҳаракат қилган, бироқ эркак бунга тўсқинлик қилган.
Суд У. О.ни Маъмурий жавобгарлик тўғрисидаги кодекснинг 41-1-моддаси 1-қисмида (жинсий шилқимлик) назарда тутилган ҳуқуқбузарликни содир этганликда айбдор деб топди ва унга 5 сутка муддатга маъмурий қамоқ жазосини тайинлади.
Аввалроқ Тошкентнинг Учтепа туманида кўчада ва ерости ўтиш йўлида аёлга нисбатан жинсий шилқимлик қилган эркак 15 суткага қамалгани ҳақида хабар берилган эди.