Ўзбекистон президенти Шавкат Мирзиёев 2026 йил 19 февраль куни Вашингтонда (АҚШ) бўлиб ўтиши режалаштирилган Ғазо секторини қайта тиклаш бўйича «Тинчлик кенгаши»нинг биринчи саммитида иштирок этиши кутилмоқда. Бу ҳақда «Ўзбекистон 24» телеканалининг «Таҳлилнома» кўрсатуви хабар берди.
Саммитдан кўзланган мақсад — Ғазода ўт очишни тўхтатишнинг иккинчи босқичини илгари суриш ва уруш оқибатида вайрон бўлган Фаластин ҳудудини қайта тиклаш учун молиявий маблағларни жалб қилиш, деб хабар берган эди аввалроқ «Дунё» АА Axios нашрига таяниб.
Саммит ўтказилиши мумкин бўлган жой сифатида Дональд Трамп номидаги Тинчлик институти (собиқ United States Institute of Peace, USIP) кўрсатилмоқда.
«Тинчлик кенгаши» устави 2026 йил январь ойида Давосдаги Бутунжаҳон иқтисодий форумида имзоланган эди. Албания, Аргентина, Баҳрайн, Болгария, Венгрия, Вьетнам, Миср, Индонезия, Қозоғистон, Қатар, Косово, Марокаш, Моғулистон, БАА, Покистон, Парагвай, Саудия Арабистони, Туркия ва Ўзбекистон кенгашнинг дастлабки аъзолари бўлди. Имзолаганлар орасида АҚШнинг анъанавий Ғарбий Европа иттифоқчилари йўқ эди.
«Тинчлик кенгаши» бошқарувига Трампнинг шахсан ўзи раислик қилади, унинг куёви Жаред Кушнер ва АҚШ давлат котиби Марко Рубио эса махсус элчи Стив Уиткофф, Буюк Британиянинг собиқ бош вазири Тони Блэр, Жаҳон банки гуруҳи президенти Аджай Банга, миллий хавфсизлик бўйича маслаҳатчи Роберт Габриэль ва Марк Роуэн, шунингдек, Американинг энг йирик хусусий инвестиция компанияларидан бири — Apollo Global Management бош директори билан биргаликда «Ижроия кенгаши» таркибига киради.
«Тинчлик кенгаши» учрашувидан бир кун олдин Исроил бош вазири Биньямин Нетаньяхунинг Оқ уйда Дональд Трамп билан музокаралари ўтказилиши кутилмоқда. Исроил кенгаш режасини қабул қилган, бироқ унинг уставини имзоламаган.