2026 йил январь ойи охирида Истанбулдаги чиқинди контейнерларидан бўлакланган жасади топилган Дурдона Ҳакимова бундай тарзда ҳалок бўлган ягона қурбон эмас эди. Бедарак йўқолган Сайёра Эргашалиева ҳам аэропортда қўлга олинган икки нафар Ўзбекистон фуқароси томонидан ўлдирилгани тахмин қилинмоқда.
Ўзбекистоннинг Истанбулдаги бош консулхонаси хабар беришича, Ҳакимованинг яқин дугонаси бўлган Эргашалиева 32 ёшда эди.
Дастлабки маълумотларга кўра, 22 январь куни марҳумалар ва гумонланувчилар (31 ёшли Дилшод Турдимуротов ва 29 ёшли Ғофуржон Камолхўжаев) Фотиҳ туманидаги ресторанлардан бирида бирга тушлик қилишган. Учрашув давомида Эргашалиева ва Камолхўжаев ўртасида унинг Ўзбекистонга қайтиш нияти билан боғлиқ низо келиб чиққан.
2026 йил 23 январь куни эркаклар Эргашалиевани пичоқлаб ўлдиришган, жасадини бўлакларга бўлиб, пакетларда Фотиҳ туманидаги кўча контейнерларига ташлаб кетишган.
24 январь куни эркаклар Эргашалиеванинг телефонидан СМС юбориб, Ҳакимовани таклиф қилишган. Унга нисбатан ҳам худди шундай йўл тутиб, жасад бўлакларини Шишли туманидаги контейнерларда қолдиришган.
Ҳакимованинг жасади топилгани ҳақида Туркия ОАВлари ёзган эди. Бироқ жасад ҳали суд-тиббий экспертизасига етказилмаган эди.
Гумонланувчиларга нисбатан қамоққа олиш тарзидаги эҳтиёт чораси қўлланган, улар айбларига иқрор бўлишган ва ҳужжатлар судга топширилган.
Бош консулхона вазият доимий назоратда эканини ва Туркия ҳуқуқ-тартибот идоралари билан ҳамкорлик қилинаётганини маълум қилди.
Birgün газетасининг ёзишича, Эргашалиева Туркияга 2026 йил 28 декабрь куни келган. 23 январдан бошлаб яқинлари у билан боғлана олишмаган.
Кузатув камераларидаги ёзувлар 23 январь куни Эргашалиеванинг ортидан унинг уйига Турдимуротов ва унинг дўсти Камолхўжаев кирганини кўрсатган. Жиноят айнан ўша ерда содир этилган.
24 январь куни гумонланувчилар уйдан бир неча бор қора пакетлар билан чиқишган, сўнгра оқ чемоданлар билан воқеа жойини тарк этишган.
2026 йил январь ойи охирида Ҳакимованинг (у 37 ёшда эди) жасади ва унинг икки нафар фарзанди Ватанга қайтарилди.
Унинг ўлдирилиши ҳақидаги хабар Туркияда намойишларга сабаб бўлди. Аёллар Дурдона ва бошқа жиноят қурбонлари учун адолат талаб қилишди.