Халқаро рейтинг агентликлари томонидан Ўзбекистоннинг суверен рейтинги оширилиши ташқи молиявий ресурсларни жалб қилиш қийматини пасайтириш ва ташқи қарзга хизмат кўрсатиш харажатларини камайтириш имконини берди. Бу ҳақда 2026 йил 30 январь куни журналистлар билан бўлиб ўтган учрашувда Ўзбекистон Иқтисодиёт ва молия вазирлиги департамент бошлиғи ўринбосари Акмалжон Ғаниев маълум қилди.
Унинг сўзларига кўра, эришилган макроиқтисодий натижалар халқаро ташкилотлар ва рейтинг агентликларининг баҳоларида ўз аксини топмоқда.
«Бу, энг аввало, Fitch, S&P ва Moody’s — халқаро суверен рейтинг агентликлари. Биз улар Ўзбекистоннинг суверен рейтингини ижобий томонга ўзгартирганини кўриб турибмиз. Санаб ўтилган учта рейтинг агентлигининг деярли ҳар бири Ўзбекистон рейтингини бир поғонага оширди».
Иқтисодиёт ва молия вазирлиги вакили таъкидлаганидек, рейтинг баҳоларининг яхшиланиши мамлакатнинг халқаро молия бозорларидаги фаолияти шартларига бевосита таъсир кўрсатди.
«Бу, ўз навбатида, биз учун халқаро молия бозорларидаги шароитлар яхшиланганидан — қарз олиш имкониятлари ёки халқаро молиявий ресурслардан фойдаланиш имконияти кенгайганидан, шунингдек, уларнинг қиймати пасайганидан далолат беради».
Хусусан, рейтинг ошиши натижасида чет элдан жалб қилинадиган ресурслар бўйича фоиз ставкаси 1–1,5 фоиз бандига пасайди, бу эса ташқи қарзга хизмат кўрсатиш харажатларини йилига 250–300 млн долларга қисқартириш имконини беради.
Эслатиб ўтамиз, S&P халқаро агентлиги 2018 йилдан буён илк бор Ўзбекистоннинг кредит рейтингини BB- даражасидан BB даражасига кўтарган эди. Fitch Ratings агентлиги эса 7 йил ичида биринчи марта Ўзбекистоннинг кредит рейтингини BB- даражасидан BB даражасига яхшилади. Moody’s агентлиги ҳозирча Ўзбекистон рейтингини Ba3 даражасида сақлаб қолди, бироқ прогнозларни «барқарор»дан «ижобий»га ўзгартирди.
Маълумот учун, 2025 йил 1 октябрь ҳолатига кўра Ўзбекистоннинг ташқи қарзи 75,4 млрд долларни ташкил этиб, йил бошидан буён 11,3 млрд долларга ошган. Хусусий ва давлат компанияларининг корпоратив қарзи ташқи давлат қарзи ҳажмидан ошиб кетган.