Ўзбекистоннинг олтин-валюта захиралари 2026 йил 1 февраль ҳолатига кўра 75,08 млрд долларга етди, бу Марказий банк маълумотларидан келиб чиқмоқда. Бу 2013 йилдан бери юритилаётган статистика тарихидаги энг юқори кўрсаткич.
2026 йил январь ойида захиралар яна 8,77 млрд долларга (+13,2%) ўсди, 2025 йил бошидан буён эса 33,9 млрд долларга (+82,3%) кўпайди.
Ўсишнинг асосий омили сифатида яна жаҳон бозорларида олтиннинг қимматлашгани хизмат қилди. Марказий банк баҳосига кўра, нархнинг бир унция учун 4389,45 доллардан 5063,45 долларгача кўтарилиши (+15,4%) захираларга тахминан 8,6 млрд доллар қўшди (октябрда ўсиш 2,5 млрд доллар, ноябрда 1,8 млрд доллар, декабрда эса 2,9 млрд долларни ташкил этган эди).
Олтиннинг физик ҳажми кетма-кет тўртинчи ой кўпаймоқда. Январь ойида у 280 минг троя унциясига (8,7 тонна) ошиб, 12,83 млн унцияни (399 тонна) ташкил этди. Бу 2013 йилдан буён юритилаётган статистикадаги энг юқори кўрсаткич (аввалги рекорд 2022 йил 1 декабрда қайд этилган бўлиб, 12,82 млн унцияни ташкил этган).
Олтин захираларининг қиймати нархлар кўтарилиши фонида 9,88 млрд долларга ошиб, тарихий максимал — 64,98 млрд долларга етди. Олтин улуши жами захираларнинг қарийб 86,5 фоизини ташкил этмоқда.
Захираларнинг валюта қисми бу сафар 1,12 млрд долларга камайиб, 9,52 млрд долларни ташкил этди. Қимматли қоғозлар ҳажми 4,8 млн долларга ошиб, 1,53 млрд долларга етди.
Халқаро стандартларга кўра, Ўзбекистон захиралари жуда юқори даражада: улар 19 ойлик импортни қоплашга етади, бу Халқаро валюта жамғармаси томонидан тавсия этилган минимал 3 ойлик кўрсаткичдан анча юқори.
Марказий банк аввалроқ захиралар таркибида олтиннинг катта улушга эгалиги консерватив ёндашувни акс эттиришини, бироқ регулятор нархлар ўзгарувчанлиги хавфини инобатга олган ҳолда портфелни диверсификация қилишни бошлаганини маълум қилган эди.
Марказий банкнинг олтин-валюта захиралари иқтисодиёт барқарорлигини таъминлашда асосий восита бўлиб қолмоқда: улар миллий валюта курсининг кескин тебранишларини юмшатиш, ташқи мажбуриятларни бажариш, инқирозли вазиятларда импортни таъминлаш имконини беради ҳамда ташқи шоклардан — хомашё жаҳон нархларининг тушишидан молиявий бозорлардаги беқарорликкача ҳимоя вазифасини ўтайди.