АҚШ Адлия вазирлиги ўтган ҳафта охирида жинсий жиноятларда айбланган марҳум молиячи Жеффри Эпштейн иши бўйича миллионлаб янги файлларни эълон қилди. Бу 2025 йил ноябрь ойида Эпштейн файлларининг шаффофлиги тўғрисидаги қонун қабул қилинганидан бери эълон қилинган энг кўп ҳужжатлардир. Жами 3 миллион саҳифа матн, 180 минг фотосурат ва 2000 та видеоёзув оммага тақдим этилди.
АҚШ Адлия вазирлиги баёнотига кўра, ушбу файллар охиргиси бўлади. «Бугунги нашр Америка халқи учун шаффофликни таъминлаш ва қонунчилик талабларига риоя қилиш мақсадида ҳужжатларни идентификация қилиш ва текширишнинг жуда кенг қамровли жараёни якунланганини англатади», — деди АҚШ бош прокурори Пэм Бонди.
Ҳужжатларда техномагнатлардан тортиб сиёсатчиларгача бўлган кўплаб нуфузли шахслар пайдо бўлмоқда, деб ёзади Associated Press ва BBC News. Уларнинг барчаси вояга етмаганлар ва ёш аёлларни жинсий зўрлашга алоқадорлигини инкор этишган. Шу билан бирга, улардан баъзилари Эпштейн 2008 йилда жинсий жиноятлар учун биринчи марта ҳукм қилинганидан кейин ҳам у билан дўстона муносабатда бўлган, деб қайд этади AP.
Архивда Эпштейннинг қамоқдаги вақти ҳақидаги тафсилотлар, жумладан, психологик ҳисобот, унинг ҳибсхонадаги ўлими ҳақидаги ҳисобот ва Эпштейннинг вояга етмаган қизлар савдосига ёрдам берганликда айбланган шериги Гислейн Максвеллга нисбатан тергов материаллари мавжуд. Унга, шунингдек, Эпштейн ва юқори мартабали шахслар ўртасидаги электрон почта ёзишмалари ҳам киритилган.
Эпштейн 2019 йил август ойида Нью-Йоркдаги Метрополитен ахлоқ тузатиш марказидаги камерасида ўз жонига қасд қилган эди. AP ва BBC News Эпштейн файлларида тилга олинган машҳур шахслар ҳақида қисқача шарҳ тўплади.
Эндрю Маунтбеттен-Виндзор
Илгари Британия шаҳзодаси Эндрю сифатида танилган Эндрю Маунтбеттен-Виндзор Эпштейн билан дўстлиги сабабли йиллар давомида қаттиқ кузатув остида эди. Эпштейннинг энг машҳур айбловчиси Виржиния Жуффренинг таъкидлашича, молиячи уни 17 ёшида Маунтбеттен-Виндзор билан жинсий алоқа қилишга мажбурлаган.
Собиқ шаҳзода ҳар қандай ноқонуний хатти-ҳаракатларни бир неча бор рад этган. Бироқ, 2025 йил октябрь ойида қирол Карл III Эндрюнинг Эпштейн билан алоқалари ҳақидаги навбатдаги фош этувчи маълумотлардан сўнг, 65 ёшли укасини қироллик унвонларидан, жумладан, шаҳзода ва Йорк герцоги деб аталиш ҳуқуқидан маҳрум қилди.
Маунтбеттен-Виндзорнинг исми ўтган жума куни эълон қилинган материалларда камида бир неча юз марта учрайди, жумладан, Эпштейннинг шахсий электрон почта ёзишмаларида. Улар Эпштейннинг Букингем саройидаги кечки овқатга таклифномасини, Эпштейннинг Эндрюни 26 ёшли россиялик аёл билан таништириш таклифини, шунингдек, суратларни ўз ичига олган бўлиб, унда Маунтбеттен-Виндзорга ўхшаш шахс ерда ётган аёлнинг тепасида тиз чўкиб, унинг белига тегиб тургани акс этган. Суратдаги юз Эпштейн қурбонларини ҳимоя қилиш мақсадида АҚШнинг Эпштейн файллари шаффофлиги тўғрисидаги қонуни талабига биноан яширилган.
Илон Маск
Миллиардер, Tesla ва SpaceX раҳбари файлларда камида бир неча бор тилга олинган. 2012 ва 2013 йилларда Маск Эпштейн билан ёзишмалар олиб борган ва молиячининг Кариб денгизидаги шахсий оролидаги кечаларга ташриф буюриш имкониятини муҳокама қилган.
2012 йил ноябрдаги хатларидан бирида у Эпштейндан «оролимиздаги энг ваҳший кеча» қачонга режалаштирилганини сўрайди ва ўша пайтдаги рафиқаси Талула Райли билан келишни режалаштираётганини аниқлаштиради. 2012 йил декабрдаги бошқа хатида миллиардер дам олиши кераклиги сабабли молиячи бирор кеча режалаштираётганини сўрайди.
Ушбу ташрифлар амалга ошганми ёки йўқми, номаълум. Маск Эпштейннинг оролига бориш таклифларини бир неча бор рад этганини даъво қилмоқда. Ўтган шанба куни Маск X ижтимоий тармоғида «Эпштейн билан ёзилган баъзи электрон хатлар нотўғри талқин қилиниши ва мени обрўсизлантириш учун ёмон ниятли кимсалар томонидан ишлатилиши мумкинлигини яхши англашини» ёзди.
Ричард Брэнсон
Миллиардер, Virgin Group асосчиси Эпштейн билан электрон хатлар алмашган. 2013 йилдаги ёзишмаларда Брэнсон Эпштейнни ўзининг Кариб денгизидаги шахсий оролига таклиф қилган. «Яқин атрофда бўлсанг, исталган вақтда сени кўришдан хурсанд бўламан, — деб ёзган у. — Энг муҳими, ҳараминг билан кел!»
Бошқа бир хабарда Брэнсон Эпштейнга Microsoft асосчиларидан бири Билл Гейтсни Эпштейн у учун қандай «ажойиб маслаҳатчи бўлгани» ва у «сабоқ чиқарганини» омма олдида айтишга кўндириш орқали ўз обрўсини тиклашни таклиф қилган. Virgin Group вакили Брэнсон томонидан ҳеч қандай қонунбузарлик бўлмаганини ва унинг Эпштейн билан ҳар қандай алоқалари ўн йилдан кўпроқ вақт олдин «гуруҳли ёки ишбилармонлик форматлари билан чекланганини» айтди.
Дональд Трамп
АҚШ Президенти кўп йиллар давомида Эпштейн билан дўст бўлган, аммо унинг сўзларига кўра, 2000-йилларнинг бошида молиячи билан мулоқотни тўхтатган. Трамп, шунингдек, Эпштейннинг жинсий жиноятларидан хабардорлиги ёки уларга алоқадорлигини инкор этади.
AP ҳисоб-китобларига кўра, Оқ уй раҳбари сирсизлантирилган файлларда минглаб марта тилга олинган. Бироқ, агентлик таъкидлаганидек, уларнинг аксарияти Трамп ва Эпштейн ўртасидаги муносабатларга қўшимча ойдинлик киритмайди.
Архивда, шунингдек, ўтган йилнинг августида Миллий таҳдидларга қарши кураш марказига келиб тушган хабарлар асосида тузилган айбловлар жадвали мавжуд. Рўйхат Трамп ва бошқа юқори мартабали шахсларга қарши қўйилган жинсий зўравонлик айбловларини ўз ичига олади.
BBC News ёзишича, ушбу айбловларнинг аксарияти текширилмаган хабарларга асосланган ва тасдиқловчи далилларсиз қилинган кўринади.
Билл Клинтон
АҚШнинг собиқ президенти йигирма йилдан кўпроқ вақт олдин Эпштейн билан алоқада бўлган. Клинтон вақти-вақти билан молиячининг шахсий самолётидан фойдаланган ва у билан Оқ уйда учрашган.
Трамп каби Клинтон ҳам Эпштейннинг жиноятлари ҳақида билганини инкор этади. Унинг вакиллари собиқ президент 2006 йилдаги биринчи жиноий айбловлардан кейин Эпштейн билан муносабатларини тўхтатганини таъкидламоқда.
Эпштейннинг қурбонларидан ҳеч бири Клинтонни унинг жиноятларига алоқадорликда омма олдида айбламаган.
Билл Гейтс
Эпштейннинг почтасида 2013 йил июль ойи билан саналанган иккита хат бор бўлиб, уларни Эпштейн Гейтсга йўллаган, аммо ўзига юборган.
Хатлардан бирида айтилишича, Microsoft асосчиси «россиялик қизлар билан жинсий алоқа оқибатларини енгиш учун» дори сотиб олишига тўғри келган.
Бошқа бир хатда Эпштейн Гейтс у билан дўстликни узганидан норозилигини билдиради. Гейтснинг вакили хатларнинг мазмуни «мутлақо бемаъни ва мутлақо ёлғон» эканини айтди.
Говард Лютник
АҚШ савдо вазири камида бир марта оиласи билан бирга Эпштейннинг Кариб денгизидаги шахсий оролига ташриф буюрган.
Сиёсатчи ўзи «жирканч» деб атаган молиячи билан алоқаларини ўн йиллар олдин узганини таъкидлаган эди. Бироқ 2012 йилда Лютник ва унинг рафиқаси электрон почта орқали Эпштейннинг оролига таклифни қабул қилишган ва у ерга фарзандлари билан яхтада боришни режалаштиришган.
2011 йилда Лютник Эпштейн билан Нью-Йоркдаги уйлари қаршисида бино қурилиши бўйича ёзишмалар олиб борган.
АҚШ Савдо вазирлиги файллар эълон қилинишига жавобан Лютник «Эпштейн билан рафиқаси иштирокида чекланган алоқада бўлган ва ҳеч қачон бирор ҳуқуқбузарликда айбланмаган» деб баёнот берди.
Сергей Брин
Миллиардер, Google асосчиларидан бири Эпштейн ва Максвелл билан молиячи вояга етмаганларни жинсий зўрлашда оммавий айбланишидан йиллар олдин Нью-Йоркдаги таунхаусида учрашишни режалаштирган.
2003 йилдаги ёзишмалардан бирида Максвелл Бринни Нью-Йоркдаги фильм намойишига таклиф қилган.
Бир неча ҳафта ўтгач, у яна унга Эпштейннинг уйидаги кечки овқатга таклифнома ёзган. Брин ўша пайтдаги Google бош директори Эрик Шмидтни таклиф қилишни таклиф қилган.
Қурбонларни идентификация қилиш бўйича танқидлар
Эпштейннинг кўплаб қурбонлари манфаатларини ҳимоя қилган америкалик адвокат Глория Оллред BBC News нашрига берган интервьюсида сўнгги эълон қилинган ҳужжатларда кўплаб жабрланувчиларнинг исмлари, жумладан, илгари номи ошкор этилмаган шахсларнинг ҳам исм-шарифлари очиқланганини айтди.
«Айрим ҳолатларда… исмлар устидан чизилган, лекин уларни барибир ўқиш мумкин. Бошқа ҳолатларда эса ҳеч қачон оммавий интервью бермаган, исмини оммага айтмаган жабрланувчиларнинг суратлари кўрсатилган», — деб баёнот берди.
АҚШ Адлия вазирлиги тақдим этилган файллардан шахсий маълумотларни ўчириб ташламагани ҳақида Wall Street Journal ҳам ёзмоқда. Нашр камида 43 нафар қурбоннинг, жумладан 20 дан ортиқ вояга етмаган жабрланувчиларнинг исмини аниқлаган. Бир неча аёлларнинг тўлиқ исм-шарифи ҳужжатларда 100 мартадан кўпроқ учраган.
Жабрланувчилар исмлари очиқланган файллар жойлаштирилганидан сўнг, улар онлайн таъқибларга учрай бошлаганини маълум қилишган, деб қайд этади WSJ.
«Адлия вазирлиги жиноят қурбонларини ҳимоя қилишга жуда жиддий қарайди ва айбсизларни ҳимоя қилиш учун миллионлаб нашр этилган саҳифалардан минглаб исмларни ўчириб ташлаган», — деди Адлия вазирлиги вакили.
Унинг сўзларига кўра, қурбоннинг таҳрир қилинмаган исми аниқланса, идора жамоаси муаммони бартараф этиш ва тегишли таҳрирлар билан саҳифаларни тезроқ қайта нашр этиш учун кечаю кундуз ишламоқда.