Исломободдаги кўчалардан бирига Тошкент номи берилди, у ерда янги барпо этилаётган боғга эса саркарда, шоир ва сиёсатчи Заҳириддин Муҳаммад Бобур номи берилди. Маросим 2026 йил 5 февраль куни Покистон пойтахтида Ўзбекистон президенти Шавкат Мирзиёевнинг давлат ташрифи доирасида бўлиб ўтди.
Покистон Бош вазири Шаҳбоз Шариф ушбу қарор икки мамлакат ўртасидаги яқин тарихий ва маданий алоқаларни акс эттиришини, шунингдек, Ўзбекистон-Покистон кўп қиррали шериклигининг стратегик даражасини тасдиқлашини таъкидлади.
У Тошкент кўчаси ва Бобур номидаги боғ томонларнинг халқлар ўртасидаги дўстлик ва ўзаро англашув ришталарини мустаҳкамлашга бўлган интилишининг яққол рамзига айланишини қайд этди.
Шу куни икки давлат раҳбарлари Олий даражадаги стратегик ҳамкорлик кенгашининг биринчи йиғилишини ўтказгани ҳақида хабар берилган эди. Улар Ишбилармонлар кенгаши, Ҳудудлар форуми, экспертлар кенгашини ташкил этиш ва қатор соҳаларда ҳамкорликни кенгайтиришга келишиб олдилар. Мамлакатлар ўртасида катта ҳужжатлар пакети имзоланди.