Флорида штати Жанубий округ федерал суди Дональд Трампга (ўша пайтда АҚШ президентлигига номзод эди) суиқасд қилишга уриниш иши бўйича айбдор деб топилган Райан Рутни умрбод қамоқ жазосига ҳукм қилди, деб хабар бермоқда CNN ва BBC News.
2025 йил сентябрь ойида ҳакамлар ҳайъати 59 ёшли Рутни 5 та банд бўйича, жумладан, ўқотар қуролга эгалик қилиш билан боғлиқ ҳуқуқбузарликлар ва федерал офицерга ҳужум қилишда айбдор деб топган эди.
Ҳукм чиқариш тўғрисидаги меморандумда судья Айлин Кэннон Рутнинг жиноятлари «сўзсиз умрбод қамоқ жазосига лойиқ» эканини таъкидлади.
«У бир неча ой давомида амалдаги президентликка номзодни ўлдириш мақсадида қадамлар ташлаган, ўз йўлида тўсқинлик қилган ҳар қандай кишини ўлдиришга тайёрлигини кўрсатган ва ўшандан бери ўз қурбонлари олдида на афсусланиш, на пушаймонлик билдирган», — деб ёзди судья.
Рутнинг ўзи Трампни ўлдириш ниятида бўлганини рад этди ва қамоқда шахсият бузилиши касаллиги бўйича психологик даволанишга тайёрлигини билдирди. Маҳкум, шунингдек, судда тегишли ҳуқуқий ҳимояни таъминлай олмагани сабабли ҳакамлар ҳайъати иш фактлари бўйича чалғитилган бўлиши мумкинлигини тахмин қилди. Рут суддан 27 йиллик қамоқ жазосини сўради, бироқ айблов умрбод озодликдан маҳрум қилишни талаб қилди, деб ёзади Reuters.
2024 йил 15 сентябрь куни Махфий хизмат агентлари (АҚШ президентлари ва собиқ президентларини қўриқлайди) Трамп гольф ўйнаётган майдон яқинидаги буталар орасида қуролланган кишини пайқаб қолишган ва унга қарата ўт очишган. Сиёсатчи отишма содир бўлган жойдан бир неча юз метр узоқликда бўлган. Шундан сўнг эркак машинада қочиб кетган, кейинроқ гумонланувчи қўлга олинган ва у Райан Рут бўлиб чиққан.
Бу Дональд Трампнинг сайловолди кампанияси давомида унга қилинган иккинчи суиқасд уриниши эди. 2024 йил 13 июль куни Пенсильваниядаги митинг вақтида қўшни бино томида яширинган 20 ёшли Томас Мэттью Крукс Трампга қарата ўқ узган эди. Ўқ сиёсатчининг қулоғига теккан. Ҳужум қилган шахс Махфий хизмат агентлари томонидан отиб ўлдирилган.