Хитой яширин эшик тутқичларига эга автомобилларни ишлаб чиқаришни тақиқлади ва илк бор Tesla автомобилларида жорий этилган бундай конструкциялардан фойдаланишдан воз кечган биринчи давлат бўлди, деб хабар бермоқда CNN.
Янги қоидалар Хитой Саноат ва ахборот технологиялари вазирлиги томонидан 2026 йил 3 февраль куни эълон қилинди ва улар 2027 йил 1 январдан кучга киради. Идора ўз баёнотида «яширин эшик тутқичларидан фойдаланишдаги ноқулайликлар ва авариядан кейин уларни очиш имконияти йўқлигини» қайд этди.
Талабларга кўра, ҳар бир йўловчи эшигининг ташқи томонида қўл билан тутқични ушлаш имконини берадиган ўлчами камида 6х2 см бўлган ботиқ жой бўлиши керак. Автомобиль ичида эса эшикни ичкаридан қўлда қандай очиш кераклигини кўрсатувчи белгилар бўлиши шарт, деб аниқлик киритади BBC News.
Ҳукумат томонидан маъқулланган ва Хитой бозорига чиқишга тайёрланаётган автомобиллар 2029 йилгача эшик очиш механизмини янгилаши керак бўлади.
Яширин эшик тутқичлари Хитойнинг электромобиллар (NEV) бозорида, жумладан, электромобиллар, гибрид автомобиллар ва ёнилғида ишлайдиган автомобилларда кенг қўлланилади. China Daily газетасида келтирилган маълумотларга кўра, улар энг кўп сотиладиган 100 та электромобилнинг қарийб 60 фоизига ўрнатилган.
Янги стандартлар фақат Хитойда сотиладиган автомобилларга тааллуқли бўлса-да, улар бутун дунё бўйлаб автоишлаб чиқарувчиларни эшик конструкциясини қайта кўриб чиқишга ундаши мумкин, чунки Хитой Халқ Республикаси электромобиллар технологиялари соҳасида жаҳон етакчиси ҳисобланади.
Чораларнинг кучайтирилиши Хитойда юз берган қатор ўлим билан боғлиқ авариялар, жумладан, Xiaomi компаниясининг иккита автомобили ёниб кетганидан сўнг амалга оширилди. Тахминларга кўра, электр тизимидаги носозлик эшикларнинг очилишига тўсқинлик қилган, натижада машина ичидаги йўловчилар ҳалок бўлган, деб ёзади Bloomberg.
BYD ижрочи вице-президенти Стелла Ли Bloomberg TV телеканалига берган интервьюсида компания ҳукумат талабларига мувофиқ дизайнга ўзгартиришлар киритишга тайёрлигини билдирди.
Американинг Tesla компанияси ҳам Хитойга етказиб бериладиган автомобиллар учун зарур ўзгартиришлар киритишини тасдиқлади.
Wall Street Journal қайд этишича, сўнгги йилларда яширин эшик тутқичлари, айниқса, электромобилларда оммалашиб бормоқда. Эшик юзасидан бўртиб чиққан ва ҳар доим қўл ҳаракати билан очиш мумкин бўлган анъанавий механик тутқичлардан фарқли ўлароқ, яширин тутқичлар бошланғич ҳолатда ушлаш учун имконсиз бўлади. Улар зарурат туғилганда ёки калит ёхуд телефондан берилган буйруқ асосида, ёки тутқич босилганда қўлда сурилиб чиқади.