Наманган вилояти Поп тумани жиноят ишлари бўйича суди Россиянинг Украинага қарши урушида қатнашган ўзбекистонликка нисбатан ҳукм чиқарди.
Иш маълумотларига кўра, 57 ёшли судланувчи У. Х. 2022 йилда ишлаш учун Россияга кетган. 2023 йил июнь ойида Рязань вилоятида катта миқдордаги мукофот ваъдасига қизиқиб, РФ Қуролли кучлари билан шартнома тузган.
У ҳарбий хизматга оддий аскар унвонида ўқчи сифатида қабул қилинган. Эркак Россия қўшинлари таркибида Украинанинг Харьков вилоятига юборилган. Асосий жанговар ҳаракатлар дронлар ва артиллерия қўллаган ҳолда олиб борилган. Унинг ойлик иш ҳақи 210 минг рублни ташкил этган.
2023 йил август ойида у иккала оёғидан яраланган ва Россиянинг Белгород вилоятидаги ҳарбий госпиталга ётқизилган ва у ерда бир неча ҳафта давомида даволанган. 2024 йил июнь ойида шартнома муддати тугагач, у жанговар ҳаракатлар зонасидан қайтган.
Суд ҳужжатларига кўра, у жанговар хизматлари учун Жуков медали билан тақланган. Бундан ташқари, 2025 йил 26 февралда унга РФ фуқаролиги берилган.
Судланувчининг ўзи суд мажлисида шартномани «пулга муҳтожлиги, қарзлари кўплиги ва моддий аҳволини яхшилаш мақсадида» имзолаганини маълум қилди.
Унинг сўзларига кўра, шартнома муддати тугаганидан кейин, 2025 йилнинг май-июнь ойларида Саудия Арабистонига ҳаж зиёратини амалга оширган. 2025 йил июль ойида Россия паспорти билан Ўзбекистонга келган, шундан сўнг яна Россияга чиқиб кетган.
2025 йил сентябрь ойида у Поп тумани ИИБга чақирилган, у ерга келиб кўрсатма берган.
У. Х. Жиноят кодексининг 154-моддаси 1-қисмида (Ёлланиш) назарда тутилган жиноятни содир этганликда айбдор деб топилди. Унга нисбатан жазони умумий тартибли колонияда ўташ шарти билан 3 йил муддатга озодликдан маҳрум қилиш жазоси тайинланди.