Таниқли комик Нурлан Сабуровга Россия ҳудудига кириш 50 йил муддатга тақиқлаб қўйилди. «База» нашрининг хабар беришича, ушбу чеклов 2026 йилнинг 30 январидан кучга кирган.
Бундай кескин чора кўрилишига артист томонидан махсус ҳарбий операциянинг танқид қилиниши ҳамда миграция ва солиқ қонунчилигининг бузилгани сабаб бўлган.
Нурлан Сабуров Москванинг Внуково аэропортида қўлга олинган. Маълумотларга кўра, у ўзига нисбатан қўйилган тақиқ ҳақида пойтахтга учиб келганидан кейингина хабар топган. Ҳозирда тармоқларда комикнинг аэропортда ҳуқуқни муҳофаза қилиш органлари ходимлари ҳамроҳлигида олиб кетилаётгани тасвирланган видеолар тарқалмоқда.
Эслатиб ўтамиз, 2025 йилнинг май ойида Сабуров Шереметьево аэропортида миграция тартибини бузгани учун ушланган эди. Ўшанда комик 5,5 минг рубль миқдорида жарима билан қутулиб қолганди. Бу сафар эса Россия томони анча жиддий жазо қўллашга қарор қилди.