Тошкентдаги Aviator савдо-кўнгилочар марказида юз берган йирик ёнғин ҳолати бўйича жиноят иши қўзғатилди, деб хабар берди Ўзбекистон Бош прокуратураси матбуот хизмати.
Иш Жиноят кодексининг 192−11 (нодавлат ташкилотда мансабдор шахслар томонидан ўз ваколатларини суиистеъмол қилиш) ва 259 (ёнғин хавфсизлиги қоидаларини бузиш) моддалари билан қўзғатилган.
Ёнғин 2026 йил 31 январь куни куннинг иккинчи ярмида марказнинг иккинчи қаватида, катта Pixel болалар майдончаси ҳамда қатор умумий овқатланиш шохобчалари жойлашган жойда юз берган. Биринчи қаватда жойлашган Korzinka супермаркетига олов зарар етказмаган.
Ёнғин ўчирилгандан сўнг майдончани кўздан кечириш давомида 2 ёшу 7 ойлик қизалоқнинг жасади топилган.
Ёнғин вақтида иккинчи қаватда ёнғин сигнализацияси ва сув сепгичлар ишламаган, зинали ёнғин чиқиш йўлаги эса ёпиқ бўлган. Сигнализация биринчи қаватда ишга тушган.