2025 йил 31 январь куни Тошкентдаги Aviator савдо-кўнгилочар марказида юз берган йирик ёнғин оқибатида 3 ёшли бола ҳалок бўлди. Бу ҳақда Milliy TV телеканалининг Millar кўрсатувига пойтахт ФВБ матбуот котиби Зуҳриддин Қурбонов маълум қилди.
Бошқа жабрланганлар ҳақида хабар келиб тушмаган. Ҳозирда тергов ҳаракатлари давом этмоқда ва видеокузатув камераларидаги ёзувлар ўрганилмоқда, деди.
ФВБ вакили ёнғин умумий овқатланиш шохобчалари ва болалар майдончаси жойлашган иккинчи қаватда келиб чиққанини тасдиқлади. Биринчи қаватдаги Korzinka супермаркетига зарар етмаган.
Зуҳриддин Қурбоновнинг сўзларига кўра, тахминан 800 кв. метр майдон оловдан зарар кўрган. Ёнғинни ўчиришга 12 та асосий ва 4 та махсус техника, шунингдек, 6 та сув ташувчи машина йўналтирилган.
Кечқурун воқеа жойида турли тузилмаларнинг 200 га яқин мутахассиси иш олиб борди. Ёнғин содир бўлган жой яқинидаги йўл ўтказгич ёпиб қўйилди.
Дам олиш кунлари марказда одатда болали оилалар кўп бўлади. Кўпчилик бу ерда фарзандларининг туғилган кунини нишонлайди.
Гувоҳлар ёнғин чиққан вақтда болалар майдончасида бўлишганини айтишди. Уларнинг сўзларига кўра, ичкари жуда тез қора тутун билан қопланган. Ўша вақтда фарзандларини қидираётган ота-оналарни кўриш мумкин эди. Тутунни кўрган одамлар кўчага қараб югуришган.
Аҳолининг сўзларига кўра, иккинчи қаватдаги ёнғин чиқиш йўлаги доимо ёпиқ бўлган.
Аввалроқ ёнғин ҳақидаги хабар ФВБга соат 15:47 да келиб тушгани, биринчи ёнғин ўчириш экипажлари эса 15:53 да етиб келгани хабар қилинган эди. Ўзбекистон ФВВ маълумотларига кўра, ёнғин соат 16:50 да қуршаб олинган ва 17:17 да ўчирилган.